加入一個月阿里巴巴遭反假聯盟取消資格 聯盟主席被揭持阿里股份

任建峰:21歲開始做兼職,亦開始經歷了取捨│方浩文

2016-5-14 11:00
字體: A A A

根據網上介紹,在香港讀大學,要經歷五件事,包括讀書(或走堂)、上莊、住hall、part-time和拍拖,甚至有人認為若不做齊,就不算是大學生。在澳洲長大和讀大學的任建峰,21歲那年開始做兼職,除代表他是一個「稱職」大學生外,亦是他長大、經歷取捨的時候。

「舊歡如夢」式「un枱」
屬龍的任建峰21歲時,正在澳洲讀大學Commerce and Law的雙學位課程三年級,主修經濟,有別於其他讀商科的中國留學生,以金融或會計等作主修,「喺澳洲,嗰個年代冇人會齋讀法律,因為一個法律學位都要讀四年,如果雙學位就可以五年拎兩個學位。我嗰時讀經濟,因為我對公共政策及時事有興趣,同埋一二年級都係經濟科目成績較好。」

自認「把口衰」的任建峰形容,自己的大學生涯經常做「白痴嘢」,更試過「惹禍上身」。「讀criminal law(刑法)時,個講師講課嘅動作好核突,佢行嚟行去講嘢,經過講台時會『舊歡如夢』式『un一un』,尤其是嗰幾課講到強姦及其他性罪行時;我哋睇住佢咁樣真係好核突,就想諗啲核突嘢去挑戰佢。」

「當時教授嗰幾堂講到,以前一啲被視為犯法的性行為,包括同性戀性行為等,但而家社會變咗,就唔係(犯法)喇。有同學同我打賭幾十蚊澳幣,問我夠唔夠膽舉手,喺教授面前話,覺得人獸交都應該合法化。於是我就忍住笑扮正經咁講,以前同性戀性行為係犯法,但而家時代唔同咗,都唔再違禁雙方自願嘅嘢,咁只要個人同動物都係自願,咁人獸交都應該合法化,個教授又同意,以為冇晒事,我亦袋咗筆錢走。」

「點知兩堂之後,有人去法律系嘅LBGT委員會投訴我嘅言論,以同性戀性行為類比人獸交,涉侮辱同志,教授稱相信我冇呢個意思,有咩誤解就向大家道歉。我嗰時就係做埋呢啲白痴嘢,而家諗返轉頭,我完全明白點解畀人投訴,自己真係敏感度係不足。」

1任建峰解說:「21歲生日,媽媽整咗好多餸,之後一時感觸攬住我喊」

鋤大Dee英文名叫「Big Two」

任建峰會上堂,亦會走堂,「我有興趣嘅科就上足佢,冇興趣嗰啲就唔返,搵人拎筆記就算」。閒來沒事,任建峰就愛在大學飯堂和朋友「吹水鋤大Dee」,他的「牌腳」除了中國留學生外,還有本地的老外同學,「我哋教佢鋤Dee,話個遊戲叫『Big Two』」。

學生+導師+編輯

在21歲生日的前幾個月,任建峰開始另一樣大學生「必做之事」─ 做兼職。「媽媽當時工作出問題,畀人迫走,情緒又唔穩定,完全做唔到嘢。屋企少咗份糧,所以我97年後半年,開始喺公文式(Kumon)幫人改卷,6澳幣一個鐘(約港幣30元);唔計暑期工嘅話,呢份係第一份兼職。澳洲嘅Kumon唔止數學,仲有英文同日文。學生嚟做卷我就幫佢哋改,有晒標準答案畀你剔剔剔,都係手板眼見功夫,啲細路即做,我即改即刻畀返佢哋。」

踏入1998年,21歲半的任建峰多了兩個身份,首個為經濟系的導師,專帶一年級的導修課,時薪50澳幣(約250元),每星期上3至6堂。另一個身份為校內的法律期刊編輯委員會成員,「通常係法律系成績比較好嘅一班就會獲邀加入」,期刊完全由學生營運,找學者做審稿人,判斷應否刊登文章。「98年初入去做嘅時候係比較悶嘅,主要係啲文入咗嚟,審稿人話應該刊登呢篇文後,我哋就拎住份文,逐個註腳(footnote)同引用文獻(reference)檢查。到後來1999年,先開始 book review 同 case review 部份嘅編輯工作。」

2
任建峰解說:「我係唱歌唔係嗌歌」

「以前走堂為咗玩,而家走堂為兼職」

開始做兼職後,任建峰第一樣經歷的是取捨。「以前走堂係為咗玩,而家唔上堂係因為做兼職。」「做兼職之後,吹水鋤Dee少咗好多喇,要做嘢喇嘛」,但他強調不是斷絕所有社交娛樂,「都會出去唱K,25澳幣(約125元)包嘢飲唱成晚。」

經歷取捨之外,任建峰做兼職亦代表自己開始為家庭付出。「媽媽被迫走,情緒唔穩定,要陪吓佢,同佢去工會,叫工會幫我哋出頭。」「屋企冇咗媽媽份糧,一定要幫補吓,就算6蚊澳幣一個鐘,唔夠養家都好過冇。」少年時代的任建峰,其實亦經歷過一次風浪,十來歲的時候父親「做替死鬼」入獄,部份財產被凍結,「真係睇住阿媽捱得好辛苦,又唔知自己幾時讀完書,同時又有親戚同阿媽講話,不如叫你個仔中學畢業之後出嚟做嘢。」21歲那年再遇風浪,任建峰已不如少年般徬徨,「唔再係喺阿媽身邊乾著急,反而幫到阿媽。算係踏入咗一個新嘅階段,當然好多嘢都仲係阿媽大晒,但至少大個仔咗。」

3
任建峰解說:「細個覺得呢張相醜樣,於是畫花佢;媽媽就話要keep起佢」

(撰文:方浩文)(圖片來源:蘋果日報及受訪者提供)

分類:|發表於2016年5月14日 上午11:00
請支持我們持續發展,透過PayPal或其他方法贊助我們!
金額:

發表評論

讀取中…
沈西城網誌│四大美少女