抹黑手段低劣狡兔死走狗烹可待 港美息差定資金流向炒股不炒市│馮仁釗│缸湖內外

滾動民調滾到爛 自己議員自己揀│游清源│社評

2016-8-26 07:00
字體: A A A

鍾庭耀相信連發夢都估唔到,港大民研竟然會衰響自己手!
今屆立會候選人的港大滾動民調,不但樣本細得可憐,而且只講名單排第一者(雖亡羊補牢,但為太晚也),更甚的是竟然仲用固網電話問,搞到誤差率太大,代表性成疑,以至令人覺得似親中組織搞的「戰術民調」,多過是學術機構做的「公開民調」。
但其實,識睇,仲係可以睇到各個候選人的成敗大勢。
更何況,專家教路,作為選民,仲有兩招可以傍身……

 

【一鑊粥是這樣煮成的!】

天下,果然沒有免費午餐!
據聞今屆立會選舉,「幫襯」港大民調的傳媒機構特別少,限米煮限飯,結果煮出一鑊粥。

所以,我們首先要問的是:何解咁少傳媒「幫襯」?
理由一:越來越多傳媒覺得無用。
理由二:越來越多傳媒不想大事報道。

你話邊個理由較可信?
你懂的!

跟手的問題是:何解咁少傳媒「幫襯」,港大民研仲要做民調?
理由一:大有大做,細有細做,只要係生意就照做。
理由二:立會選舉點少得港大民研,少錢都要焗住做。

你話邊個理由較可信?
你也懂的!

不過,正所謂「臨時演員都係演員」,所以「滾動民調都係民調」,多多少少都有參考價值。

 

【你的一票有無白投?】

須知道,滾動民調的特色是睇趨勢,即係唔係齋睇個別候選人單日的支持度。
原因好簡單,老鼠尾生瘡,滾動民調的樣本畢竟大極有限,睇單日根本睇唔到個真像。

但係,如果某個候選人長期處於高位,咁佢就好大機會會當選,vice versa!
以港島區候選人為例,葉劉淑儀的支持度一直徘徊在25-35%之間,即是長期處於高位。照咁睇,佢冇得輸!
而這亦解釋到,葉劉點解成日病,而推排第二位的陳家珮出場,皆因有機搶到兩席也。
而同區的詹培忠,其支持度則一直徘徊在1-3%,即是長期處於低位,想贏都難。
換言之,滾動民調對選民的最大參考價值,主要在於長期處於高位或低位的候選人。對於中游分子或支持度坐過山車的候選人,很難說得準也。
再以港島區為例,何秀蘭就屬於支持度坐過山車的候選人。
她的支持度一度高達12%,但日前卻跌至2%,而其高低支持度的比率更幾乎是一半一半。
在這樣的情況下,好難講你的一票有無白投!
好彩,專家教路,你仲有兩招可以傍身……

 

【點樣做個真‧選民?】

對此,台灣熱門博客「人渣文本」版主周偉航有話好好說。
周偉航做過馬英九和國民黨議員幕僚,也做過民進黨競選總幹事和辦公室主任,他在新著《做個真‧選民:選舉工程48講》裡指出,一般公民解讀民調有兩個要注意的地方:
一、真正最準的「民調」,其實是政治人物的表情。因為他們看得到內部民調,所以表情反應是最真實的。你看他一臉死灰,或是笑得很死魚,又或是一天到晚罵人,民調就不可能高。
二、要推敲民調背後的因果結構問題。

第一點大家有眼見,對建制派候選人大致適用。不過,對非建制派候選人就未必說得通,因為大部分泛民候選人都「莫財」,冇乜內部民調可言。
第二點則要套在香港講多幾句。
以新界東為例,陳志全的支持度反覆向下,更一度跌至「零」,這就令人想起兩個可能性:
一、選民已有替代選擇。
二、有人散播他「棄選」或「hea選」謠言。
這兩個可能性不但不會互相排斥,更可以互補。
這,就難免會令人進一步想起,中共要搞掂陳志全和梁國雄的傳言。

 

【終極投票指標!】

在正常的社會,選民想投邊個就投邊個。但在畸型的社會,支持非建制派候選人的選民就要自行配票,以至好倚賴民調,尤其是港大民調。
所以,情況,絕不樂觀。
最後,只能提供一個筆者認為較為過得自己過得人的投票指標:
投畀邊個候選人,要睇此君係咪consistent!

分類:|發表於2016年8月26日 上午7:00
請支持我們持續發展,透過PayPal或其他方法贊助我們!
金額:

發表評論

讀取中…
《左鄰右里搞搞鎮》: 坦蕩 Vs 隱藏│陳廷清網誌