梁振英兼任國家領導人違反一國兩制 港股可苛存亂世香港是借來時間空間|馮仁釗|缸湖內外

【專訪】高達斌:還柙七警係咪想打壓警隊士氣因而放軟手腳? 點解司法系統要用英文?|方浩文

2017-2-17 07:46
字體: A A A

七名警務人員在2014年雨傘運動期間,於龍和道暗角毆打前公民黨成員曾健超,在星期二被裁定襲擊致身體傷害罪罪成,還柙至今日判刑。有支持傘運者慨嘆這是遲來的公義,但另一方面亦有人不滿裁決,甚至在網上留言批評法官,以至司法機構要發聲明稱高度關注,並已把事件轉交律政司跟進。到底批評法官者,憑何認為七警案裁決有欠公允?《852郵報》找來愛港之聲主席高達斌向大家解釋,並分享他對現今法治的看法。

曾健超被「暗角打鑊」的片段,事發當日僅一個早上已在全港網絡瘋傳,「拳打腳踢」烙在眾人的腦海中,但高達斌對曾健超的傷勢嚴重程度有保留。「七警有幾傷害曾健超呀?佢傷得幾嚴重呀?你睇佢精神奕奕、食得瞓得、思路清晰,仲騷畀人睇背面有幾個印,嗰幾個咩印呀?如果真係用警棍「扮」落去應該係一條條,佢一個圈一個圈,擺明係警棍督落去。你話傷,咁係輕傷定重傷?如果七個警察,男子漢嚟,唔係細路,用對腳去踢佢,如果真係要傷害佢,肋骨都冇呀!點解佢仲可以企起身冇事呀?」

近日建制派對七警案的評價,為「警察都是人」,雨傘運動期間身心都受極大考驗,例如貴為法律學者的經民聯立法會議員梁美芬指七警不是有心傷人,只是「有人去刺激佢(哋),甚至用到警隊完全冇辦法接受嘅侮辱形式」,甚至認為可以此作求情輕判,類似的言論亦可見於高達斌。「由頭到尾都冇嚴重嘅傷害,證明當時啲警察只係小懲大戒,因為你用啲不知名液體潑啲警察,令人哋有咁嘅反應係好正常嘅,同埋當日係佔中已經好多日,啲警察已經畀人鬧到好燥,你要體諒警察當時嘅心情,法官有冇體諒?」

有別於大導演高志森「又要威又要戴頭盔」,高達斌開宗明義質疑主審法官杜大衞的公正性,先是要七警還柙候判的決定,「你班七警使乜還押、監禁佢呀?佢哋有屋企,住警察宿舍,你要搵佢搵到佢吖,使唔使咁樣侮辱佢呀?黃台仰(本土民主前線發言人)呼籲人哋去掟磚,等候審判時仲可以保釋去印度,點解佢就得?佢唔緊要呀?掟磚搞到成個旺角暴動,仲緊要過嗰七警去打一個人喇啩!咁點解佢仲可以保釋逍遙法外,警察就要收監?你背後想做乜嘢?係咪想令警察士氣受打擊,因而放軟手腳?如果咁樣講,我哋市民嘅身家性命財產邊個保護?係咪要用解放軍保護呀?想陷中國政府於不義呀?」

七警案的關鍵,為一段由無綫新聞部拍得、一度被河蟹的新聞片,法庭接納所有錄像片段、照片和閉路電視錄像皆為真實,並準確反映當日發生的事件。不過高達斌就認為「信片段係真」,就是問題。「何謂信?咁咪即係人治囉!你單憑一個信字,條片有冇剪接過,中間有幾十秒空白,你知唔知?(有環境證據同衣著喎)偏私咪喺呢度囉!個官憑佢覺得,呢啲咪人治囉!(咁點審都人治?)所以呢個世界上暫時嚟講係冇法治,只有人治。」

由七警案講到香港的法治,高達斌認為一般的民事及刑事案都能保持公正性,但一涉政治事件的審訊,「(法官)係有將個人嘅政治立場擺落去」,審案時「有判斷、感情同過往經歷」。不過話雖如此,高達斌直言怪不得法官,因為問題是出於制度,「鬼叫你特區政府畀咗一個咁嘅《基本法》嘅框架,要沿用香港以往嘅制度,只能要求儘量公平,但同時香港市民係咪值得審視而家嘅司法系統係咪有問題呢?」然則即是甚麼問題?

「而家香港嘅法官係點樣產生出嚟?邊個委任佢?個過程係點?大律師公會係點組成嘅?可否重新組合過,裡面有啲審核資格可以由特區政府某啲諮詢架構去委任?之後再經中國政府批准。」

在高達斌眼中,香港的司法制度問題甚多,其中一個他最看不過眼的,是語言!「大佬,今時今日啲法官好離譜一樣嘢,大律師公會主席、馬道立(香港終審法院首席法官)、律政司司長係香港人、識講廣東話,點解喺法律年會嗰度全部用英文講呀?中國嘅地方點解唔用中國嘅語言呀?英文唔係唔用得,但你個演辭係講畀全港市民,咁係咪應該用大部份人最塾悉嘅方式去表達?特首同財政司司長讀施政報告同財政預算案用廣東話,點解係你司法系統要用英文講?呢班咁嘅法官係視中國嘅國體如無物,先會對支持中國立場嘅有所偏頗,所以喺判案上面不自覺地重刑啲。」

說到最後,今次七警案未見判刑,已有人因發表批評法官的言論,隨時惹上「藐視法庭」的官非,高達斌擔心嗎?「我唔知咁樣係唔係藐視法庭,係你就拉我啦!」

(撰文:方浩文)(圖片來源:司法機構及蘋果日報)

分類:|發表於2017年2月17日 上午7:46
請支持我們持續發展,透過PayPal或其他方法贊助我們!
金額:

發表評論

讀取中…
市民點會服?|鍾劍華網誌