查理斯干政英政府信件公開 輿論指倘登基後必「大有為」

法政匯思

-法政匯C

係唔係睇一班法律界嘅SOLIT同BAR現晒青筋講捍衛乜乜、捍衛物物有時睇到怕?其實佢哋都要搵食要行街要飲嘢要睇戲要睇電視要睇報紙要做人仔女要做人男友女友要做人老公老婆要做人老豆老母。想知佢哋唔現青筋嘅時候搞乜同諗乜?法政匯C話你知!

法政匯思網誌│第一次被挑機

2015-5-14 12:37
字體: A A A

風水大師同事每次巡經我間房,都探頭入嚟順口問「幾時得閒幫手呀?寫博客呀。」「搏咩話?」「博客呀!Blog。」「噢。」「要寫乜㗎?」「潮文。你寫慣嘢,對你冇難度啦。」

我唔明白。我呢啲上咗年紀嘅人,風水大師同事憑乜認為我識寫潮文。我首先要知道嘅係:乜嘢係潮文。

我走入官仔骨骨同事間房「請問 …」「孫公,有乜賜教呀?」「… 點樣先算潮文?」「你有冇聽過,是咁的呀?」「是乜話?」「是 咁 的。」「係咪即係 … 是這樣的呀?」「係囉。」「咁點解唔寫 … 是這樣的 … 啫?」「咁咪唔潮囉!」噢。明哂。

是咁的。

交代一下背景。我哋呢啲事務律師,生活絕對冇大狀乜乜乜咁精彩。返工、開會、寫嘢、講電話、改嘢、講電話、再改嘢、放工,咁就一日。間唔中先去法庭見下官,見下對家(解作:打對台嘅律師)。我哋的確成日寫嘢,但對象唔係客戶,就係官同對家,語調規矩正經,內容有根有據,睇哂書、指引、案例先敢落筆。老實講,我哋寫嘅嘢有幾悶,係不為一般人所知。行家睇慣咗就冇事,外人肯定寧願雙目失明(情況就如同我焗聽袁國強司長講嘢一樣~極速催眠)。寫潮文,唔係我果瓣。

雖然呢行啲人唔算潮唔算型,但勝在肯求真求証,唔識學到識。我於是乎打開本潮語字典 … 5g即係唔知、巴打即係 brother、鳩嗚即係購物、R底即係淆底、傻的嗎、認真便輸了,我明哂喎。

大大份外籍同事經過,想約我飲咖啡,但見我戴住老花鏡,眉頭深鎖,枱面一大堆書,以為我做緊大案,調頭即閃。R底。

電話鈴聲響。「KK speaking。」「KK,份嘢我想咁同咁改 …」心果句:不如你話我知你係邊位先啦。「…咁改法行唔行得通?」「得嘅,但成份嘢嘅結構 …」「都係唔好。不如你咁改。」「你記得我哋原本傾好咗 …」「咁就照番原本啦。唔該哂喎。」講呢啲。

終於等到禮拜六。街坊強嬸隨口問「你哋果行呢排好出位喎!」心諗:風水大師同事都未扮女人,有幾出位?「噢。後生仔,係血氣方剛啲嘅。」「咁點解你又癲埋一份呀?」「噢。」咄咄逼人,強嬸絕對有條件做律師。「是咁的,因為我都有底線㗎。」底線。

猶記得……我條底線第一次被挑機,係1999年。當年嘅律政司司長梁愛詩以證據不足同公眾利益為由,唔檢控星島集團前主席胡仙。你話我知證據不足,我吹你唔漲。但梁司長夠膽講,當局考慮嘅公眾利益係,一旦胡仙被起訴,星島集團幾千名員工會失業。我當時即刻對住喺電視機裡面嘅司長怒吼「我係讀得書少,但都知公眾利益唔係咁用,妳真正係呃細佬,講完!」表情激過高永文局長九條街。

後來立法會對梁司長提出不信任動議,自由黨轉軚,做法屈機,連人稱bill 王嘅資深律師夏佳理都嬲到離場。佢離席前最後講嘅嘢係「… I am afraid I cannot continue with this debate, and I shall withdraw from this Chamber. Today, whatever the result of this motion, there are no winners. The loser is Hong Kong.」

唉,所以話,你估我呢啲老嘢好慣學金沙哈咪打咁扮潮學寫潮文咩。有啲嘢,叫做迫不得已。

(撰文:孫公公@法政匯思)(標題經本報增刪)(圖片來源:now新聞台)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年5月14日 下午12:37

發表評論

讀取中…
屈穎妍撰文死撐警察 指智障漢「頂多受苦72小時」│范中流