喬布斯「知己」升職任設計總監 分析指背後或有耐人尋味動機│樂思施

劉貳龍

-臥虎藏龍

學民思潮成員、基督徒、學生。因為基督信仰參與社會運動,認為基督徒不能只在教會裡離地生活,而是與社會事務有密不可分的關係。並且是樂觀的理想主義者,誓要以「直接行動」將不可能變為可能,將理想轉化為現實。

劉貳龍網誌│密室談判是暗藏殺機的一場戲

2015-5-26 19:06
字體: A A A

一句到尾,泛民唔好又同京官密室談判啊!最簡單的一個原因就是,當本土派呼籲人地唔好出席支聯會的六四晚會時,每個泛民都仆出黎爭住話唔理解唔明白,論調都係講唔好分化泛民主派的政治力量,要團結地令共產黨見到燭光之後好唔開心,香港人對八九民運好有感情,一百幾十萬人上街聲援又有物資又有黃雀行動同各方面的支援,更令大家當時要求加速民主化的步伐,總結一句就係八九民運好重要記得出席六四晚會,這些我大致上都認同。(當然對六四紀念的方式或論述上可再改善,但這並非本文要討論的重點。)

但當梁振英話「六四活動年年有」,同京官密室談判的機會不多,將八九民運矮化到無關痛癢的地步。如果泛民聽完之後都決定「放棄六四」,北上同京官密室談判的話,姐係間接話比全世界人知道,你地之前講關於出席六四集會既野,其實都係廢話得個講字。只要有幾個京官肯用少少時間接見,即使是臨近六四,悼唔悼念為八九民運捐軀的學生同市民,是否向屠夫政權示威抗議,依堆大是大非的事情都可以擺埋一邊。到時比人批評講一套做一套,記得唔好出黎講「攻擊同路人共產黨最開心」,因為係你未返大陸面聖之前,已經有人仆出黎提醒你,你地自己硬係要攞黎衰,就唔怪得其他人。

況且再退多一步黎睇件事啦,學長毛話齋如果北京有誠意同泛民傾,就改期唔好係六四遊行先黎密室談判啦。只要係正常人都睇得出,北京唔係智障佢都識睇日歷,一年有365日甘多好日子唔揀,偏偏就係揀你搞六四遊行果日先約見面,早幾日同遲幾日都唔約得既?甘樣擺明就係要設個兩難局面推你去死,去六四遊行唔見京官又會比689話你唔珍惜機會,否決政改的責任在於泛民唔肯比誠意談判。然後老屈泛民做普選殺手,要在立法會及區議會選舉將佢地逐出議會(Vote Them Out),即係好似譚耀忠所言,要搞到泛民無埋否決權,然後政府就可以在議會橫行。如果泛民去見京官唔去六四遊行,當然少不了比重視六四的市民鬧爆,居然見幾個幾京官緊要過關於為六四討回公道的行動,更會被輿論質疑會否重演2010年政改時,某政黨臨近政改表決時同北京傾掂數,然後一個「華麗轉身」就唔理香港人意願。

面對前者689同班官的批評,你都可以同選民解釋,假普選最多得689元秋樹根比你揀要黎都冇用,況且「袋住先」隨時就「袋一世」,甚至令到政府有虛假認受性推行23條等惡法,選舉時可以救得幾多票得幾多票。後者泛民選民的批評關乎到泛民對於六四的言行合一,政黨與市民的互信問題,有幾重視為八九民運捐驅的英烈。後者相對前者的批評大罪幾萬倍,泛民只要衰其中一宗罪,都夠你去烏江自刎幾十次。

而且早幾個月見林鄭果時仲被佢玩唔夠咩?當時臨雙方見面之前,忽然有張政府的14人撬票名單流出。某泛民議員即刻出黎講,政府甘樣做即係比個陷阱佢地踩,絕對係陷泛民於不義。但唔得!我地要繼續去見林鄭!叫佢唔好分裂泛民!明知係對手設比你既陷阱,明知會令傳媒玩捉鬼遊戲,明知選民會質疑你會轉軚,明知連雨傘運動都未迫到對手有絲毫讓步。你都要拎住兩梳蕉行入政總或大陸同班官密室談判,唔係天真到以為佢會在無更多條件轉變的情況,忽然大發慈悲拖捨真普選比你下話?明知對手設既陷阱,你都要踩落去自殺,甘樣的天才我除左祝君安好之外,都唔知同你講d咩好啦。

其實講到尾今次政府又拎黎陷你於不義果條橋,只係將果份14人的撬票名單,轉左做要你返大陸見京官,甘就唔好又衰多次啦,拜托!同埋最搞笑就係,這邊箱689跳出黎叫泛民「珍惜與京官見面機會」,傾傾否決政改後的安排、下次機會係幾時啊、北京會否提出泛民接受的方案。但那邊箱北京手下班卒仔,例如劉兆佳又為雙方會面先對公眾做期望管理,吹風話「十年內不重啟政改」、「分歧大難斡旋 」、「會面實際作用不大」,轉過頭鄭燿棠又出黎講,政改已經是「最大優化方案」同「標點符號都不能改」。照枱面上的說話黎睇,即使未會面但議題的答案都有齊,如果北京真係有心坐低同泛民傾的話,晨早就會叫佢班卒仔唔好亂講野啦。所以講到尾,雙方會面只係走過場的一台戲,更是一台暗藏殺機的戲。

還有啊,長氣都要講埋。其實政府早就承傳左當年人稱「林公公」的必殺技,就係將相同既說話講完又講似足部人肉錄音機,每日起身都話比全世界知道人大831決議「不可撼動」,然後范徐麗泰又講現在討論提委會四大界別的公司票轉個人票是太遲了,連自己友陳弘毅教授提出的白票守尾門方案,都被人大的張榮順話係鼓勵反對派搞事封殺左。而泛民之前又「三日一聯署,五日一記招」,對全香港700萬人拍曬心口講話「否決假普選」,就算北京係聾既都會收到曬啦。所以如果雙方到左今日,重係立場無變意志堅定的話。其實大家返大陸、政總、甚至是中聯辦裡面傾,只係浪費時間而又無謂的政治行為。不如有假期就返屋企訓教休息下,或者買部PS4開FIFA 15踢多幾場波,甚至將對黑警的怨氣發洩係GTA 5入面既警察,放鬆下臨近政改表決的緊張心情好過。

最後啦,講到依到!如果重有泛民堅持「放棄六四」,返大陸同京官密室談判的話。我只能夠提醒你地,近來大陸都落好大雨,小心地滑,睇路啊!

(圖片來源:莫乃光fb)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年5月26日 下午7:06

發表評論

讀取中…
ISIS進佔管理員逃亡 敘利亞瀕危鳥難倖免