菊戲網誌│虐老有感

虐老事件睇到人人眼火爆，最惨係婆婆們赤身露體等入浴條片仲要係咁播，每睇一次，個心就酸一次。

菊戲有感而發，其來有因，記得上個世紀，菊戲初出茅廬，跟老細拍公共事務節目，其中一集就係講私營安老院。

八十年代中期，資助安老院舍床位嚴重不足，長者要好似輪公屋咁等四、五年，先輪到宿位，可惜等到有位時，好多已身體日差，不能自理，結果係要好諷刺地重新排隊，輪候入住資助護理安老院，甚至護養院。

咁情況下，私營安老院自然大行其道，政府亦樂得逐步停止資助慈善安老院，社會福利署一為交差，二為堵口，搞咗個私營安老院騎哩三級制，主要評級標準竟然係院舍有冇聘用合格護士，而非居住、膳食、照顧水平。如此一來，的確幫到一班，sorry，唔係長者，係肯抛個身出嚟開安老院嘅註册護士，可以大大個字寫「社署評為甲一級安老院亅廣作招徠。

菊戲仲好記得，拍過一間喺正今次出事大埔劍橋樓下嘅地舖安老院，間沖涼房冇暖管，得塊破布窄門簾，公公婆婆沐浴，全無私隱，幾十年前係咁，幾十年後今天照樣係咁，再幾十年後菊戲俾仔女遺棄落劍橋牛津哈佛，照樣係咁……

諗到呢度，唔止心酸，直頭心寒。