警方清理添美道雜物 辯稱不是清場│金世傑

Ed(呢啲)

-edyeah呢啲嘢啊?

一名業餘歌唱愛好者, 一名饕餮, 一名喜歡攝影的人士, 一名唏噓的廣告佬。 一名「周身刀,無張利」嘅朋友。

Ed(呢啲)網誌│京阪行(三) -了語花香

2015-6-13 13:03
字體: A A A

一早起身,已經想也不想地搭巴士(仲撞到導盲犬!)衝去一間日只賣百碗的和牛飯地方,可惜,都係唔夠快,不是平日了嗎?點解仲係食唔到…仲要係咩都無得食,全部售罄。唯有死死地氣搭番勁遠車,由京都嘅西南搭番去東北,再次引證,有些事,您認為您夠努力了嗎?是不能也非不為也。最慘尋日落大雨,我部相機入哂水咁,勁多霞氣,影相有層霧咁,唯有希望佢快啲乾啦。

日の出うどん(日出烏龍麵) – 特式咖哩烏龍麵(辛)
搭到南禪寺同哲學大道個邊,落車都搵咗陣,仲要排咗好一陣隊,好彩店家都好好咁放咗部火爐機係度俾客人取暖。每日開得個5粒鐘,淨係呢份個幾粒鐘夠我保持品質又搵到下,有再多錢都唔賺嘅生活態度,就已經令人敬佩。

IMG_0109

日出的婆婆,一開頭狂同我講日文,之後我開口知我唔識日文,佢個樣好趣緻,最衰影唔低嗰個樣,驚訝加O咀表現得淋漓盡致。佢好好咁拎個多語言餐牌俾我,仲想用自己有限的英語解釋畀我聽。我一早心中已經有特定想食嘅,做足功課先嚟嫁嘛,特式咖哩烏龍麵是呢度唔可以唔食嘅招牌,而我也是為咗佢山長水遠咁嚟啊。出名賣烏龍麵(烏冬),仲要配咖哩,引死人咩。

IMG_0116

入到去你大概知點解要等一定時間先入到去幫襯,店家好尊重每位客人使用餐廳嘅空間,2人就能坐4人位,3人就能坐6人位,睇你好唔好彩,我咁啱等正2人枱,仲對正個廚房可以俾我無咩禮貌咁影一輪。點菜後提供口水肩,方便食客可盡情飽頓,不怕彈到身上。

IMG_0114

點咖哩烏冬,伙計會問你要幾辣,我就揀咗中辣,叫個陣其實都心思思叫再辣啲,後來食食下就知已經好夠皮了。就算一早係店外已點菜,都係等你坐定定先開始煮俾你,所以要俾啲耐性,咁樣好就好在你入店前已知自己點唔點到想食嘅嘢。

IMG_0121

菜未上到時,已經聞到好香嘅咖哩味,更加令到一早食唔到和牛飯嘅我食指超大動。一大碗泥黃色咖哩湯,飲啖湯頭就知香料的種類多,細滑帶粘,能易於掛在麵上,味香重而甚至帶少許藥材味,辣氣慢慢上,所以食落非常醒神。

烏龍麵好煙軔,咬口特別強,「噓」上 嘴有種回彈力。我也看不到麵的本身顏色了,說是湯麵,更是汁撈。

除咗湯同麵,碗內裏有三大料頭,三樣簡單的發揮不同功用而令烏冬更不得了。腐皮角,索哂啲湯汁,而且帶甜味,可調劑辣味。九條蔥,是京都菜的基本配搭,咖哩再濃也難掩蔥香,而少許青草味亦減輕咖哩湯的重口味。牛肉碎,牛肉配咖哩不嬲都係絕配,肉片溶於湯中。

食完之後行去搭巴士,真係有種「而摸,之沙啦」同一屋簷下嘅日劇feel, 搭洛巴士落番去,就到銀閣寺路段啦。

銀閣寺 (www.shokoku-ji.jp/g_about.html
原名慈照寺,因內設觀音寺,通稱「銀閣」,為文化遺產,景靚唔在講,一路沿住嚟行,有種柳暗花明又一村嘅感覺,由銀閣寺垣入到銀沙灘、再行經向月台、然後走過錦鏡池,沿路細看每張入眼嘅光景,都係一張張名信片式影像,你有無見過影片式嘅名信片?原來景色真係可以咁靚,最神奇係望完會有種鬆咗嘅感覺,可能係寺廟的威力?如是,唯謝菩薩,謝Karma。

DSC02082

哲學大道
舒一口氣,再走回頭路,落到哲學大道的街口,竟飄雪。長2公里,旁有水道有櫻,可恨花季沒到,因京都大學哲學教授西田幾多郎經常行此道冥想而於1972年正式命名。流水聲與漫漫雪,急湍而不吵,緩落而隨意,好配;陽光照得猛,雪到手就溶,好虛。原本想到咖啡館坐坐,看看時分秒,不待人啦,要去二條城,所以跑咗上一架計程車。

二条城www.city.kyoto.jp/bunshi/nijojo/index.html
司機叔叔雖是有限公司,幸好都教到我點行多兩步慳番少少水腳,日本搭的士實在係高消費…為咗趕去無法子。江戶時代建起,曾為德川家康之居。靚一靚嘅就係佢嘅唐門,有少數日式建築中搵到嘅獸狀雕刻,有獅虎龍蝶鶴龜仲有龜仙人!詳情可見呢度

DSC02101

行完唔影得相嘅御殿,就會見到好搞笑嘅包實蘇鐵樹,幫佢包暖咁話喎。

DSC02112

少不免一城最高點,天守閣看看。

DSC02130

行入梅林個下勁開心,因知不是櫻季,已無打算可以見到影到咁多花,搞到我狂影咗一輪,影到差唔多收城先行,唯一係有三個著和服的女士無咩公德咁嘈同阻人影,然後佢地又當我係當地人而當住我面講我…

DSC02144

くら寿司 – 自動化迴轉壽司
行完二条城,天都開始慢慢轉黑,順住走不懂的地圖,見到被放好於欄上的手套,練習棒球的學生,騎單車的主婦,那慢活的感覺,很舒暢。

行到黑哂天,先搵到我想一試嘅迴轉壽司著名店,Kura!出名在於佢有自動化嘅系統。

DSC02180

每個卡座都有一部iPad點壽司,只要係軌上見唔到自己心儀嘅,可以篤篤佢落order即到,仲會行上面條軌,送到位前。

DSC02192

入到壽司鋪,做番啲入廟拜神式嘅動作,就係沖茶,值得一提係呢度嘅綠茶粉好飲,仲任加唔嬲,茶包會愈沖愈淡,呢隻唔怕啊。

壽司味道全部都唔錯,以一碟只係港紙6蚊左右同埋新鮮十足,絕不馬虎,唔洗入明將打大佬咁。全部都唔係幾洗落山葵(Wasabi)同豉油,足以證這間壽司店可改寫迴轉是劣食嘅印象。

蔥三文魚,作為蔥怪嘅我一見即立埋嚟,蔥爽口帶辛同軟口的魚肉夾啊,咁搶口嘅蔥味都蓋唔到魚嘅鮮味,證明抵哂。

墨魚,一拎到埋嚟見到半透明咁狀態已經收貨啦,墨魚新鮮才半透,仲有塊紫蘇葉係底,襯哂味,視覺上又好睇。

帶子,呢樣屈哂,映出光身嘅相片已證實到佢有幾正斗,厚身味濃,喂,100円咋老細!

IMG_0193

醃魚仔軍艦,見佢個樣唔錯就拎嚟試下,因是醃製食品,所以較咸。但佢好就好在佢仲係脆身,好香口。

IMG_0195

燒豚肉,原本覺得佢好似搞搞地gag咁,但人一世物一世,明將紅荳都玩過,唔會輸俾區區呢個嘅。食落就覺得自己輸咗啦,佢係一碗迷你燒豚肉飯囉唔該,雖然keep唔得熱,但味道都算一流一。

三文魚子,一向係我飛佛,粒粒無皺皮明亮橙中一點紅,咬落去仲扑扑聲,仲整塊青瓜慌死唔夠靚。

IMG_0197

海膽扇貝軍艦,海膽最怕唔新鮮拎嚟撈嘢,因為會搞涴(音:喎)哂。海膽味鮮,已經扇貝切粒後好彈牙,又一水準之作。

鯛魚軍艦,鮮甜而且粒粒大粒,絕不慳皮,味鮮肉實。

炙燒 三文魚,邊有咁厚嫁平時,厚得嚟仲要好香三文魚油脂味,點解嫁…點解可以咁正嫁。

甜蝦,守尾門嘅係佢,諗起我媽媽最鍾意食佢,咁啱速遞路軌有客人點咗佢走過,見幾新鮮即試試。簡直就係玻璃蝦,晶瑩剔透,爽夾甜。

仲有墨西哥卷你揀,你話死未。

好味唔在講,呢間自動化壽司店唔淨止落單自動化,連收碟計數都唔洗專人嚟。每個卡座都係枱上斟水機隔離設有一個入碟口,俾客人將食完壽司嘅碟放入去計數,因為碟碟100好易計。而且,佢仲每5碟會抽獎一次,大獎係減500円,iPad上仲有動畫睇你自己中唔中,我就唔好彩啦,但都聽到全場唔少顧客中咗。

IMG_0187

由頭到尾,整個食嘢過程只係話你聽幾號位同俾錢個下有人,全程自己顧自己,我一個人霸咁大張枱,好疏肝!

食飽飽就決定再去食個甜點,一出去就見落勁大雪,行到去巴士站已經滿身雪,勁凍。搭番去京都站,就已經無雪啦,撞正有音樂噴泉睇。

茶寮都路里 – 綠茶甜食 特選都路里パフェ(聖代/新地)
與中村藤吉齊名的茶寮都路里,未能有時間在祇園本店試試,唯有到京都站伊勢丹分店啦。開心嘅係我揀得啱,係茶寮都路里同中村之間揀咗間仲未有得係香港食嘅。係京都站要轉啊轉啊上啊上啊,行咗十幾廿層先搵到。入內搵位,店員講多兩句知我係遊客就提我佢地快要收鋪,要快食同埋last order要一次過落。

入到去聽到幾邊客人都係香港人,但連埋全體客人都係女士,搞到我有啲唔好意思。一坐低就有一杯熱茶一條巾,個身行咗咁耐都未凍完個下覺得好無微不至啊。

見有期間限定嘅食品,但個樣唔太吸引到我,而我揀咗款經典啲嘅,同埋佢係咁多款之中係最貴嫁,嚟得梗係試好嘢啦。特選都路里出名在有好多料,而上甜品時已經靚到無譜,一層層綠白色嘅組合就似食物模型一樣,你有無見過圖片與食品相符甚至更好的甜品?茶寮都路里就係啦。

DSC02251

頂層:抹茶鮮忌廉、抹茶蛋糕、抹茶雪糕、粟子、抹茶寒天;
中層:抹茶丸子及白玉丸子、紅荳、雲喱拿雪糕;
底部:寒天配綠茶糖漿。

頂頭部分係由軟綿綿到實少少再配濃味到不得了硬少少嘅粟子,忌廉用綠茶整少咗份甜濟感,配落帶厚茶味蛋糕又贈上幾分甜作平衡。抹茶寒天是以令每口食品都有茶味,但對比下有分別,就是這種多層次感的茶味才令整個甜品更加豐厚。

中間主力令您舌頭減少茶感,紅荳配丸子又係一個經典配搭吧,荳淋而入口散開,丸子就有咬口,雪糕簡單而又令中層不致單調。

底下作為綠茶控也非常滿意,由寒天淡口味配濃濃的綠糖漿。清得嚟又夠份量成為一個綠茶甜品的最後幾啖。

其實係好味到我唔係太記得中途再影,三爬兩撥就隊哂成個份量勁大嘅甜品。仲要話係啱啱食完飯,好癲。

食完發現出面都有擺放住呢款甜品,順手欣賞下日本人整食物模型的精細。

食到滿足就搭巴士番酒店,食咗甜嘢好似零舍好訓,今晚又有新嘅房友,傾咗好耐先捨得訓,佢係一名住係福岡的學生,因為放假而嚟咗京都體驗下,佢話好多日本學生都會咁。雖然言語不通,但我哋用不同嘅翻譯工具去傾,好搞笑。最正係佢鍾意Metal音樂,睇個樣完全唔似…

同佢傾到尋日好大雨又盛咁,佢用日文(後尾轉咗做英文俾我睇)講咗次同香港出名「你點知聽日一定會好天」個廣告嘅口號,真係講「生命滿希望,前路由我創」之類俾我聽。個股正能量不斷不斷咁由佢口中湧出,個份熱血完全擊倒我。

搞到我訓前諗好多,有時睇開啲就知發生緊嘅事,無論衰定好,過往都會俾到個答案你,點解會搞成咁,或者點解會成功。

春花秋月何事了,往事知多少?我就話往事知分曉。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年6月13日 下午1:03

發表評論

讀取中…
賈洋鬼子網誌│前言不對後語 皆因無Cobra!