天文台已發出八號烈風或暴風信號

法政匯思

-法政匯C

係唔係睇一班法律界嘅SOLIT同BAR現晒青筋講捍衛乜乜、捍衛物物有時睇到怕?其實佢哋都要搵食要行街要飲嘢要睇戲要睇電視要睇報紙要做人仔女要做人男友女友要做人老公老婆要做人老豆老母。想知佢哋唔現青筋嘅時候搞乜同諗乜?法政匯C話你知!

法政匯思網誌│咩叫好嘅求情?「警棍碰到他人」算唔算?

2015-7-9 16:38
字體: A A A

話說大狀乜乜乜個大律師事務所上星期嚟咗個summer(即係暑期實習生),事務所個阿頭(英文又真係叫Head of Chambers喎)一個老實不客氣同乜乜乜講:「喂,幫我帶個小朋友上法庭睇下嘢啦,你啲刑事案好睇過我啲民事嘢好多!」

乜乜乜自己都係新仔,真係想同阿頭講:「我都做完學生冇幾耐,帶學生呢家嘢,我識條鐵咩!」唔知點解,呢句話講咗出嚟就變咗:「好呀!冇問題!」

不過咁,民事案件有時又真係悶啲嘅,啲實習生嚟嘅時候唔知頭唔知路,有時文件都未睇晒,實習期就完咗,走嘅時候一樣唔知頭唔知路。刑事就直接易明得多,咩傷人盜竊詐騙非禮,係人一望就大概知咩回事,相對民事嗰啲咩地役權信託復歸法律構定信託等等,就真係聽到個名都頭痛。

「好啦,阿Summer(就叫佢Summer啦),聽朝九點去荃灣裁判法院第一法庭睇我做個求情啦。」

「求情?呃…Mr 乜乜乜,唔好意思呀,咩係求情呀,係咪即係搏吓同情,求吓法官放過被告,唔好判呀被告有罪呀?」

「吖?唔係!」Summer聽講都係某著名大學法律系3年級學生,冇奶油唔明咩係求情吖嘛,不過見到佢咁天真爛漫個樣,乜乜乜都唔係好忍心窒佢。

「唉,古語都有云「拉人講興趣,『釘人』講證據」啦!有罪冇罪,法官唔係睇被告值唔值得同情,而係睇究竟有冇足夠嘅證據吖嘛!所以呢,就算個被告身世幾咁賺人熱淚,都只可以係求情理由,唔可以攞嚟為個被告辯護脫罪。」

Summer個表情望落似一個大問號:「咁,既然求情幫唔到個被告,咁求嚟做乜呢!」

乜乜乜強作鎮定:「喂!我冇話求情幫唔到個被告喎。係,求情係唔可以幫被告脫罪,不過求情可能幫到被告減刑喎!簡單嚟講,求情就係被告被法官定咗罪後,由被告本身或代表律師提供啲譬如被告背景之類同量刑有關嘅資料,希望法官睇完之後會從輕發落咁啦!」

「哦,原來係咁!但係審訊時個官都聽過晒個被告背景啦!求情咪好似好重複咁?」

哈!又蠢唔晒喎!

「冇錯,審訊時法官可能已經聽過啲被告嘅背景,但始終審訊時法官最關心嘅就係證據,同求情有關嘅嘢,最好都係定咗罪一次過考慮好啲。再加上有啲被告一早唔使審就自願認咗罪,咁樣法官對佢地嘅背景就唔會太清楚,被告或代表律師就更加有需要做好啲求情。」

「咁,點先為之一個好嘅求情呀?」Summer又用佢天真無邪嘅眼神望住乜乜乜。

「首先一定要有悔意,千祈唔好響求情入面話個被告係冇心犯事嘅。事關冇心即係冇犯罪意圖啦,冇犯罪意圖響刑事嚟講係唔可以構成犯罪,咁法官又點可以定你罪 呢?舉例嚟講,朱警司話佢只係「警棍碰到他人」好明顯就係死不悔改,句說話等於辯解,如果攞嚟做求情,咁就死得,一定俾個官鬧死!」

Summer恍然大悟:「噢,我明啦!解釋即係掩飾!」我笑笑:「唔,有啲慧根,咁聽日仲去唔唔呀?」

「去!呃…不過」「不過咩呢?」Summer搔搔頭:「不過我唔記得講,我聽日學校有事請咗假…」「…」(都話咗帶學生呢家嘢,我識條鐵㗎啦!)

(撰文:大狀乜乜乜@法政匯思)(標題由本報編輯所起)

(原圖:蘋果日報)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年7月9日 下午4:38

發表評論

讀取中…
八號波仍未掛 立法會先休會