蓮花環流細　聽朝大家準時返工啦！│樂思施

隨著強烈熱帶風暴蓮花逼近；天文台喺下午4點40分終於發出八號西北烈風或暴風信號。

不過個風距離香港已經110公里咁近（直至下午五時），似乎都仲係無咩料到；2012年嘅時候，韋森特距離香港100公里啊，已經發出十號風球喇，咁係咪代表蓮花冇料到呢？

當然啦，蓮花係強烈熱帶風暴，同強颱風韋森特風力上當然就無得比啦。不過，大家都千祈唔好咁睇小蓮花。而家香港咩風雨都無，係因為蓮花屬於環流細、北面強南面弱嘅小型颱風，唔代表佢嘅風力特別弱，只要一進入風圈就會即刻大風大雨。天文台話香港傍晚天氣急劇轉壞，咪就係咁解囉。

（大家留意台灣右手邊嘅雲團，佢就係燦鴻，嗰風圈就相對較珠江口附近嘅蓮花大喇）

不過呢風圈細亦都意味住，個風會「來得快去得快」；諗住今晚打通宵麻雀嘅，思施勸你都係打消呢個念頭喇，聽朝記得準時返工。

（撰文：樂思施）