梁特猛推「創新及科技」 另闢蹊徑「深港同城化」│范中流

家計會堅離地舉例 生五個講真定講笑?│皇甫清

2015-7-10 21:50
字體: A A A

家計會今日出咗條廣告片,搞到網絡世界一地花生殼,無他,事關條片話只要預先計劃好,就算生一個、兩個,甚至五個,都冇問題。

當家陣不少夫婦都一個起兩個止嘅時候,家計會居然仲話生五個都冇問題,自然令到網民嘩嘩聲,大嘆家計會舉個例子都「堅離地」。

首先,特首梁振英連老人宿位唔夠,都可以歸咎係土地不足嘅問題,你就可想而知香港嘅住屋空間係幾唔夠啦!簡單而言,一般育有兩名子女嘅家庭,都未必有個三房兩廳嘅單位,兩名小朋友可以一人一間房。生五個,邊樹搵咁多空間俾佢哋瞓?唔通又要好似以前咁,買個三格床返嚟,仲要叫其中一個抵諗啲瞓地?

當然,你可以話「我父母嗰個年代個個生十幾個,咪又係咁樣長大!多個人多雙筷之嘛!」OK,不過前提係,擺上枱嘅餸並唔會因此增加,你要頂肚就只可以食多兩啖白飯,係每日餐餐都係咁,你得嘅話咁咪生五個囉!

撇除社會經濟因素唔講,十月懷胎之所以偉大,正正就係因為懷孕唔係一件容易嘅事,君不見好多夫婦費盡心思都未能組織小家庭?而且家計會公布嘅數字都顯示,隨著香港人趨向遲婚及遲生育,首次生育年齡中位數上升到31.3歲,但婦女在35歲後成孕機會會急速下降。當夫婦嘅經濟條件許可生五個,就算「開盡turbo」三年抱兩,都要超過六年先完成生五個嘅目標,用返首次生育年齡中位數31.3歲嚟講,即係最少37歲先可以「收工」,屆時父母們能否同時應付五個年糼嘅子女,又係另一個問題喇!

講到最後,家計會叫人生五個都係舉個例啫,不過舉個例都引到網民熱議,只可以話呢個例子真係「堅離地」咯!

(撰文:皇甫清)

請支持我們持續發展,透過PayPal或其他方法贊助我們!
金額:
分類:|發表於2015年7月10日 下午9:50

發表評論

讀取中…
梁特領軍連日圍剿 要莫乃光「票債票償」│范中流