馮煒光四處報料遭冷待 分析指梁特近乎孤注一擲│范中流

曾德成鄧國威「問責」下台 吳克儉同陳茂波呢?│皇甫清

2015-7-21 23:11
字體: A A A

民政事務局局長曾德成同公務員事務局局長鄧國威今日喺無任何先兆下即日唔do,震撼成個政界同社會。

雖然梁振英口口聲聲話唔講人家點解離職,不過好快都有消息傳出,佢兩位阿哥查實唔係炒老細魷魚,而是「被換人」。根正苗紅嘅曾德成,就被指係因為青年工作做得唔好,佔領行動主力係後生仔就印證咗呢點,而且佢本人喺佔領行動期間保持低調亦係問題之一。至於鄧國威呢,就因為他多次以必須緊守既定調薪機制為由,阻撓梁振英意圖藉大幅加薪嚟收買公務員,又有消息話各公務員團體都對他有微言。Anyway,總之就係兩位都抵炒有餘。

查實曾德成同埋鄧國威都係問責官員(後者係唯一一名唔使脫離公務員身份嘅問責官員),若然佢哋真係有失當嘅地方,要佢哋起身離職,都係好合理嘅。如果梁特真係覺得曾德成主理青年工作力有不逮,又或者鄧國威喺公務員加人工一事上做得唔好,不妨理直氣壯地用呢兩個理由叫佢哋離職啦,何必呢頭閃閃縮縮,話不便講人哋嘅離職原因,嗰頭又猛向傳媒放料呢?

另一方面,梁振英今日喺記招度又借用外國勢力,話相比歐美、甚至台灣,香港嘅班子都係十分穩定。梗係啦阿哥,因為個個問責官員做錯嘢都唔使問責吖嘛!發展局局長陳茂波畀人踢爆搞劏房、囤地、醉酒駕駛、誹謗罪成,成籮醜聞纏身都依然繼續做官。仲有教育局局長吳克儉,上任唔夠半年就有國教風波,搞到中學生都要絕食,到最後仲要由「奶媽」林鄭拖住出嚟見學生,自己喺林鄭隔離聲都唔敢聲。三年以來,教育政策理解度同領導能力都不足,天水圍德怡幼稚園因為無法續約要結業,佢只係講一句無能為力,連藝人曹永廉嘅太太姜依蘭同埋張松枝都喺微博鬧爆佢。不過你咪理,佢依然做緊教育局局長,拎緊幾廿萬一個月。

相信經過今次事件之後,大家都會明白,其實所謂問責制,係向邊個問責,同埋邊有先有資格向班高官問責咯!

(撰文:皇甫清)(圖片來源:政府網站)

請支持我們持續發展,透過PayPal或其他方法贊助我們!
金額:
分類:|發表於2015年7月21日 下午11:11

發表評論

讀取中…
閂門七件事(21-7-2015)