高志森：其實，食多兩隻皮蛋都含鉛嘅啦⋯│皇甫清

鉛水風波到而家，政府同政黨都繼續抽查不同住宅項目嘅水辦，甚至為居民驗血，確保食水同血液都唔會含鉛量超標。不過與此同時，都有唔少人喺外圍話其實好多大家接觸到嘅嘢都會有鉛。

最新一個例子就係導演高志森，佢昨晚喺fb度話：「其實，食多兩隻皮蛋都含鉛嘅啦⋯」，又強調旨在提醒大家要小心食落肚嘅嘢。姑勿論佢講呢句話係咪為咗替事件降溫，不過有一點要介紹返嘅，就係皮蛋同鉛嘅關係。根據2006年嘅《選擇》，消委員測試咗19款皮蛋，當中只有7個樣本驗出砷或同時驗出鉛，但含量遠低於法例規定嘅最高准許濃度。

所以高志森嘅fb status嚴格嚟講係冇錯，皮蛋真係有鉛，但同今次食水含鉛風波的嚴重程度差好遠，首先食水嘅焊料本身就唔可以含鉛，其次食水嘅含鉛量係超出世衞標準，更重要嘅係，已經有市民嘅血液含鉛量超標。

說到最後，就算我哋身邊有唔少嘢有鉛嘅成份，係咪就代表可減輕今次食水含鉛風波嘅嚴重性呢？相信大家都答案喇！

（撰文：皇甫清）（圖片來源：YouTube截圖及維基百科）