「黨五毛」自稱遭人上門圍毆 山東共青團譴責事件│廣雅仁

張志剛借外國例子撐換人 香港任命有冇得聽證先?│皇甫清

2015-7-23 22:45
字體: A A A

前民政事務局局長曾德成同前公務員事務局局長鄧國威星期二一同宣布離任,而佢兩位係畀特首梁振英請食無情雞都近乎係公開嘅秘密(前者更令到佢哥哥曾鈺成證實,唔係自己提出唔做)。梁振英頭號智將、行政會議成員兼一國兩制研究中心總裁張志剛今日就喺《經濟日報》撰文,為事件降溫。

張志剛喺文中表示,香港之所以行問責制,就係因為之前嘅公務員終生聘用制,令到政府高層嘅調動幾乎完全欠彈性及適應性;用問責制就可以讓行政首長有更大彈性去選其管治班子,云云。佢又指,世界主流嘅政治問責制入面,問責官員來來去去,其實都係閒事一則,以美國商務部部長而言,過去20年就經歷過9人,每人平均任期只有27個月。由是觀之,政治問責官員離職其實真係好等閒亦不用解釋太多。

首先,讓我哋唔好執著喺數據呢啲嘢上面先。今次離任風波之所以咁具爭議,係因為

1,如果真係因為能力問題而要問責下台嘅話,點解發展局局長陳茂波同埋教育局局長吳克儉冇份?呢兩位老兄做咁耐就畀人媽住咁耐,民望長期包尾,咁都唔使問責下台嘅。

2,梁特開記招時就話無謂講人哋離職嘅理由,不過「梁粉」網媒「港人講地」之後就極速引述「權威人士」消息話曾鄧兩位係被炒,仲大爆佢哋被炒嘅原因,成晚毒箭滿天飛,數到佢哋一文不值,抵炒有餘。一個政府以呢啲陰招去踢走唔聽話嘅人,自然惹人爭議同懷疑啦!

3,今次梁特換人可謂極度倉卒,全個政府都冇人知要炒人,更有傳曾德成上星期仲約人傾未來有咩民政事務可以做。而兩名新接任嘅局長亦曝露晒今次換人有幾趕,新任民政事務局局劉江華話曾德成離任當日先「第一時間」請教對方,而新任公務員事務局局長張雲正就更厲害,宣布獲委任當日根本唔喺香港。單係上述三點,就足以令到大家繼續去追究事件當中嘅問題。

「外國例子不適用於香港」

另外,張志剛喺文中借用「外國勢力」,話外國嘅政治問責官員未完成任期就走其實好普遍。不過佢講漏咗一樣嘢,就係呢啲國家都係民主國家,官員任命係要先經過國會聽證會,唔係由得個總統亂咁點人嚟做。雖然表面上好多時都會通過任命,但其實背後牽涉好多游說及「摸底」嘅工作。例如2013年8月底,美國總統奧巴馬原本諗住提名薩默斯做聯儲局主席,不過負責審核任命嘅參議院銀行委員會入面,最少有三個民主黨黨員反對任命,喺點都傾唔掂數嘅情況下,結果薩默斯9月中就宣布退出角逐,寧願自己體面地走,好過到時畀人否決提名咁面懵。

所以話,唔好講梁特政府喺處理今次換人事件上,手法有幾多問題,破壞咗幾多一直沿用嘅不成文規定,單係人事任命要先過聽證呢一點,特區政府就點都比唔上其他行政治問責制嘅國家啦!

(撰文:皇甫清)(圖片來源:香港電台及Senator Menendez NJ YouTube截圖)

請支持我們持續發展,透過PayPal或其他方法贊助我們!
金額:
分類:|發表於2015年7月23日 下午10:45

發表評論

讀取中…
專家警告 全球變暖再難容「2度」空間│杜連魁