讀者投稿|丫丫:對盧寵茂懷疑自己遇襲/李國章懷疑老人被虐二事有感

《文匯》話衝會場學生可被踢出校 跳step跳到離晒譜│皇甫清

2015-7-31 23:21
字體: A A A

港大校委會遴選副校長嘅風波到今日都尚未平息,成員之一嘅袁國勇今日宣布辭去校委一職,指今次遴選風波源頭唔係星期二晚衝入校委會會場嘅學生,而係好多外面不同嘅政治勢力試圖影響結果,自己冇能力將呢啲矛盾轉化成力量,唯有離開。

不過一眾建制派未有放過袁國勇口中唔係風波源頭嘅學生,今日《文匯報》就聲稱,翻查《香港大學條例》中嘅相關規程,發現涉事港大生「已有機會」違反多項明文規條。報章列舉嘅規例包括校長馬斐森當晚多次以安全為理由呼籲學生離開但不果,有關學生或違反咗「沒有遵從校長或主管人員的命令而導致大學行政中斷」嘅規定;委員之一嘅盧寵茂當日因為右膝痛而倒地,但就畀質疑係「插水」,《文匯》就話如果學生喺欠理據之下誣指佢「插水」假受傷,亦「有機會違反」誹謗大學人員嘅條目。最後,如果盧寵茂係因為畀學生踢到而受傷,涉事學生亦會涉嫌觸犯襲擊大學教員嘅罪名。

講到咁似層層,原來又係「當堂嚇一跳,然後得啖笑」。首先,當日馬斐森係咪「命令」學生離開?如果有睇當晚片段嘅話讀者或會記得,佢叫大家離開時,語氣頗溫和,可以話係呼籲,好難同命令拉上關係。

另外,報章指學生話盧寵茂「插水」就有可能係誹謗,不過如果學生話佢痛得誇張,又點算係「誹謗」?最多話佢忍痛能力低啫!

最後,報章話如果盧教授係畀學生踢傷,學生就涉嫌觸犯襲擊大學教員嘅罪名。問題係,連盧寵茂都冇法證明係被人踢傷,校委李國章一開始引述佢話係被人踢到,之後佢就話「唔知我撞人定人撞我」,都最後就話右膝碰到硬物,觸傷舊患。更重要嘅係,盧寵茂昨日出院時都話過,學生係要教育,唔會就受傷一事追究。

當事主都話唔追究,《文匯》仲繼續話學生被裁定違規,有機會被開除學籍,真係「皇帝唔急太監急」!

(撰文:皇甫清)(圖片來源:香港大學學生會學苑即時新聞 fb)

請支持我們持續發展,透過PayPal或其他方法贊助我們!
金額:
分類:|發表於2015年7月31日 下午11:21

發表評論

讀取中…
女性同時「愛」幾人 有助促進與情侶關係│杜連魁