《誓不低頭》講黑警　警察嬲嬲豬玩封殺？│皇甫清

自《大時代》起，無記成功開拓咗一條深夜煲舊劇嘅路綫，嚟到第三部，就係韋家輝1988年嘅作品《誓不低頭》。上星期嘅戲肉當然係曾江飾演嘅陸國榮，因為抵唔住舅母（李香琴）終日嘅冷嘲熱諷，終於要爆，用刀斬死晒佢一家五口同埋謝文武（鄭少秋）個外母。斬死人不特止，陸國榮仲要賄賂警察脫罪，而其中一個有份收錢嘅警察岑波（郭峰）就順手嫁禍畀謝文武；陸岑二人聯手，謝文武水洗都唔清。

話就話創作還創作，現實還現實，不過原來當年警察對呢條劇情十分不滿，認為歪曲咗警務人員嘅形象，四個警務人員協會仲試過聯致函一哥，要求對無記採取適當行動。其中本地督察協會更表示會要求修訂電檢條例，同埋致函當時無記主席「六叔」邵逸夫，要求道歉。

當時警方發言人就表示，已就劇集去信電檢處反映意見，並檢討給予無記協助之程度；其後，就有傳警方因此而封殺無記一排，拒絕無記申請拍街景同開槍，無記當時要拍開槍戲，亦只能夠以好渣嘅特技嚟交代就算。

其實正所謂「本故事純屬虛構，如有雷同實屬巧合」，而且背景為尚未成立廉政公署嘅1970年代初，警察收黑錢同屈砌生豬肉，又有咩咁大不了？不過最有趣嘅係，而家播返《誓不低頭》，有網友轉載返呢段新聞，大家嘅留言都係話……我都係唔講好了！

（撰文：皇甫清）（圖片來源：韋家輝影視天地 [FB群組]）