梁特又叫港青到內地交流　「北上發展」無限loop│皇甫清

特首梁振英今日出席香港大學生軍事生活體驗營畢業禮。佢致辭時表示，大學生係未來嘅社會棟樑，要關心祖國、充實自己，又指政府重視青年發展，積極開拓青年到內地及海外交流嘅機會，希望培養具創意和國際視野嘅人才，加強香港長遠競爭力，云云。

其實有關的言論都不止一次出於梁振英的口，上月初他出席「青年專業論壇」時，就寄語青年「機會是留給有準備的人」，鼓勵他們北上發展，把握一帶一路的機遇等等，當時佢仲有金句，話唔係有佢創立嘅專業聯盟不失時機，喺90年代打開內地市場，今日大部份專業課程嘅大學畢業生「畢業等於失業」。

可見叫年輕人北上都差不多係梁特嘅主旋律，雖然與此同時佢成日話香港人才不足，要輸入外地（其實咪又係內地）專才。

另一方面，有參加體驗營嘅學生表示，呢十幾日嘅訓練令自己嘅作息變得有規律，又唔認為係「洗腦」，因為營中軍官唔會強迫學員接受佢哋嗰套，不過梁特致辭又話，希望學員經過呢個體驗營，能夠明白解放軍如何維護香港繁榮安定。呢頭話個營唔洗腦，嗰頭又話認識解放軍…嗯，一定係梁特諗多咗，一定係！

（撰文：皇甫清）（圖片來源：無綫新聞截圖）