游清源日記|聖羅蘭示範:不是殖民地化,而是香港文化!

Ed(呢啲)

-edyeah呢啲嘢啊?

一名業餘歌唱愛好者, 一名饕餮, 一名喜歡攝影的人士, 一名唏噓的廣告佬。 一名「周身刀,無張利」嘅朋友。

Ed(呢啲)網誌│京阪行(五)-得辛應首

2015-9-23 22:58
字體: A A A

好像還未適應好京都與大阪之別,大阪好像慢版香港,慢極都有個譜。酒店隔離有個景點無理由唔去嘅,食早餐前就碌去睇吓。

難波八阪神社 – 獅子神社
難波嘅八阪神社,屬京都主社的分社,有好多好多獅子的裝飾,仲有個特大舞台係為節慶用。

2

美國村 – Flying Tiger (flyingtiger.com/)
行完啲古代建築,就行到期待已久嘅美國村,呢度嘅街燈係有如一個人烏低身咁嘅樣,條條柱都有唔同「圖騰」係上面,令人會想轉個街口望哂佢哋。有間排哂隊的愛麗斯世界咁嘅主題店,見全部排都係女仔,就知唔係好啱自己吧。

走著被一間落地透明玻璃的店內排得滿滿的人所吸引入去,原來係間創意家品店,由德國搭飛機嚟,有好多趣味家品,我都忍唔住手買咗啲。

北極星 – 蛋包飯發源地
引我行咗陣,仲係一大朝早,咩都未食梗係二話不說去咗醫肚先。北極星係蛋包飯嘅發源地,已經有過百年曆史,一間和木平房的設計,於美國村內有點出眾。入到去要除鞋之外,就係坐他他米。又一個人霸一張枱,這份空間感是香港沒有的。

DSC02587

北極星的蛋包飯唔係嗰種中間一刀就會蛋汁完整包著飯粒,他也是半熟,卻不流心,外型有如食物模型般沒兩樣,美與公整得有點假。選擇咗磨菇配料嘅我更能感覺到菇被蛋漿包著煮熟的氣味,能於不大不小的軟滑蛋內尋寶。飯蛋菇足味,而茄汁作伴有很好的提味作用,帶出點點輕盈意式風情。

另外,那杯咖啡幾好飲,濃滑。

DSC02592

食飽飽就周圍遊,求其入間鋪都有排睇,皆因間間鋪都有自己特式或主題,有啲似利時咁,但係街鋪。最正嘅係一街古著店,話就話古著,但係整齊整潔,同埋無半份梁味,唔會刻毒涼薄。又有一大間AA,又有Lego店,仲有唔少樓上店,都係排得好好,分類清晰的二手時裝。雖然我無入手太多嘢,但對眼係開咗界嘅。仲有個商場間鋪係勁多波子機係入邊,十分新穎。

元祖アイスドッグ つうてん – 雪糕熱狗
轉個頭嚟到出名的三角公園,順手一試拎咗專利得大阪呢度先有嘅雪糕熱狗。開頭計劃行程個陣,心諗一舊雪糕,一舊包,可以有幾特別,需要特別去拎專利咩?結果去到美國村,還是乖乖去咗潮拜,證明佢拎專利嘅行銷方式,係成功嘅!

再者,真係食到嘅時候,又真係幾好味喎。一件新鮮滾熱辣嘅油香炸包,配濃香雲尼拿味冰冰凍雪糕,如此冰火口感,實在矛盾得嚟又出奇地夾。炸得熱熱的包兩下整到雪糕半溶,份冰冷香滑減去炸包的油感,有點像炸銀絲卷所製的泡芙。

DSC02624

堀江
行完呢堆都未夠喉,再轉戰堀江,呢一帶有好多精品家品店,又係有擺放得好整齊嘅二手名牌店,行行下仲經過一個卡通片常見嘅沙地遊樂場。

きじ(Kiji) – 大阪燒
咁上下,又要食嘢啦,唔醫肚又點繼續上路。去到新梅田,即刻去附近有條出名嘅食道街,集合了 100多間店鋪,為了救濟舊國鐵時代的相關行業退休人員而開,自1950 年位於鐵路站樓下,所以3到5分鐘左右就會有轟隆轟隆嘅聲音。到咗食飯時間,成條美食街都變得墟冚,好似我哋旺角啲小食檔門口咁,排章魚丸排就似排魚蛋。嚟到大坂梗係要食番地道嘅大坂燒,一嚟仲搵間十足日本現代劇,打工仔放工會去排隊食個款,入鄉隨俗。

DSC02680

淨係排隊都排咗四五個字,但係一路由門口排,到轉上樓梯開始聞到香味,再望住最後幾個就坐得見到師傅駕輕就熟嘅技藝,呢種層層遞進嘅引誘,無一個美食愛好者頂得住。凡夫俗子輕則打尖爭位,重則衝上去搶嚟食(講笑)。我期待咗好耐睇下有無得坐吧枱,即係可以望住佢煮,鐵板燒睇住佢煮個款,咁先有風味嫁嘛。

坐好係位,手指篤兩篤就開始等食啦,我坐係成間餐廳嘅中間,睇到哂所有嘢,一飽眼福。爭爭交疊嘅耍鏟功夫不絕,師傅「表演」技藝在於熟手,不在花巧,但搞下呢搞下路就整好一塊大阪燒。喺香港好少地方有得食大阪燒,就算有都會係啲特別地方,一係鬼鬼馬馬個種,一係就貴價。但係邊會有呢種放工後嚟聽住火車聲呢?

DSC02681

全間七八成客人都揀拉麵喜好燒,剩低就係大阪燒,我叫咗個咩都有的mix,有豬肉、蝦、花卷、墨魚、椰菜、蒟蒻。因為材料多,咬口複雜,麵糊淋而餡爽,呢種交雜口感再配埋重頭戲燒汁,差啲令我想試埋第樣。好彩為食的理智叫我收制,等等仲有嘢要試。

DSC02686

因為係吧臺,全程熱住塊餅的鐵板都係同師傅共享,仲有個小鐵鏟俾我開小份嚟食,有種我係小廚神嘅感覺,有得玩有得食。另外值得一提係店家善用細小角落,開蓋式座位俾客人放低隨身物品,食嘢時不致捩咁棄(le gum hea)。

見到師傅熟手調配煮料,仲可以同伙計客人有傾有講,好似對手同口係分屬二人。煎餅小食客人快嚟快去,仲會每次都講句「歡迎光臨」同「多謝,歡迎下次再嚟過」。親切與人情味,難擋。

走個陣,人龍排得更長。大概是美味食物、地道風格、熱切服務、相宜價錢,黃金結合之成吧。

Hep Five
食飽飽,行去望望個商場身上的摩天輪,找找那天荒地老。值得一提,商場內有間古著鋪好正,無影相添…商場仲有另一標誌係紅鯨母子大型裝飾。

金龍拉麵
大概是遊大阪,每天也會習慣走到道堀頓作結。行到咁上下,又會就腳係個樹食少少,好難不肥吧。吃了個地道的燒餅,也去吃吃平民拉麵吧。金龍拉麵係道堀頓分店多多,我去嘅係十字路口的大鋪一間,門口頂頭仲有一隻大龍作標誌。買飛仔換拉麵步驟係日本不見怪,超過9成拉麵店均用這一模式做生意,我買咗多叉燒拉麵,多幾片叉燒無咁齋。

埋位前仲有金龍最爽皮嘅任夾辣韭菜、泡菜、生蒜,俾飛後店員有個亞加力膠牌俾客人拎住認,我仲偷影咗廚房一下,勁有土炮feel。周圍除咗係日本式要除鞋埋位外,加埋部電視,裝設不知幾似港式快餐店。

DSC02707

拉麵到~賣相唔錯,九條蔥花一大堆,仲有奶白豬骨湯底,幾塊肥叉。食落都已經跑嬴一大堆香港叫就叫日本料理嘅拉麵,但對比自己日本嘢啦啵,就差少少咁啦。識得金龍嘅都知佢勝在價格相宜,開7×24,夜一夜shop完ing想食啲嘢,出哂血又唔想咁貴,就啱哂。

DSC02709

加哂啲伴菜落麵,都幾辣下,但夠惹味。叉燒又唔係話好香,但夠肥軟,仲夠大塊。假若大家鍾意抵食夾大件,金龍絕對不錯。

惹味到呢,我係飲哂碗湯,見到個「囍」字碗底。望只望,喜會來。

第二天,在大阪。走到了自己喜愛的古著區域,也吃了本地所命名之食物,不斷的在人群中來又往,好像經歷了於港的遊客的感受。

有時侯,有時侯,針唔拮到肉唔知痛是對的。往日你放棄了一些,換取另一些;追求更多,失去的相對的。但那就是人生,決擇的是自己,言悔也不能言敗。

只是痛了些。哎呀,撞到應一應添。

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年9月23日 下午10:58

發表評論

讀取中…
甘民樂「插」豬 犯法咩?│杜連魁