科爾賓拒出席樞密院就職典禮 為免向女王下跪│杜連魁

林溢欣遭天價挖角 「第一代補習天王」點睇?│范中流

2015-10-8 20:12
字體: A A A

今日相信最能惹起大家話題的新聞,應該都是早已上市的補習公司「現代教育」,在另一間補習公司「遵理學校」正籌備上市時,公然在報章刊登全版廣告,打「開口牌」出到每年收入可達8500萬元的「天價」,「邀請」對方中文科星級導師林溢欣加盟。

但事件看在香港一位「第一代補習天王」眼中,就只僅值一個字:「ridiculous」(「荒謬」);不過當中荒謬之處,卻不單在這位新一代中文補習天王的身價。一切的分水嶺,又在當年傳統名校的「貼題名師」,怎樣陸續下海來將這門補習行業,搞成今時今日。

當年曾在「英訊」任教

這位「第一代補習天王」,其實如今已是時事評論員的黎則奮(Q仔、Q爺)。七十年代末期,他有份參與香港第一間大型補習社的工作。這家名叫「英訊」的補習社,堪稱當年中學生的一代回憶。

「嗰陣時,有位做公務員嘅師兄胡國亨,睇準咗不少中學生,都因只係會考英文『肥佬』而影響往後事業;佢研究過當時英文嘅考試要求後,發現其實只要過到作文一關,合格都已經相當有把握。當時佢又見到唔少人仍然要返夜校,於是就參照呢個『大班教學』模式,搵嚟幾位一齊想搞生意嘅,結果一戰成功。」

八十年代曾年賺過百萬

至於黎則奮本人,當時都不過是在「英訊」打工;眼見老闆當時以「不合格即原銀奉還」為噱頭,還有向全港學校送贈免費英語教學雜誌作宣傳,結果一同感受到這股「英訊奇跡」;到後來輾轉之下,他八十年代初更另辦「新英訊」,最高峰時候港九共開了五層樓的教室,年賺過百萬元。那時候,港島康怡花園的500呎新盤,都不過是約30萬元。

「嗰時候請大學生兼職輔助教學,都只係兼職斷鐘計,其他嘅基本上都係老闆賺晒;點似依家淨係做負責教嗰個,仲好搵過公司老闆?」

「貼題名師」發酵補習行業

雖則其後因股東爭拗而退出「新英訊」,但黎則奮坦言,看著其後八、九十年代,香港補習行業出現一個突變關鍵:不少原本在傳統名校以貼題著名的名師,陸續離校入行,索性將獨門秘方用來面向全港學子。

「呢啲老師原本本身都係喺考試局做過panel(科目主任),熟悉考試局出題走向同人事;佢哋出嚟自己搵食後,又往往吸引到佢哋以前教開嘅名校學生,慕名而嚟博攞會考題目貼士。但呢啲學生本身其實底子原本已經相當好,就算最尾貼唔中都可以攞到A,反過嚟令呢啲補習老師個聲譽更加響。

結果,搞到依家學生補習已經係嚟求5**,啲家長為咗咁就更肯畀錢,補習社然後就為咗爭客,將啲老師明星級包裝,同時為咗搶名師而出到分紅制度;搞到補習呢行啲生意,今時今日就變到咁樣水漲船高。」

有學校竟安排學生集體補習

黎則奮更坦言,近日側聞有部分中學,為了保住學校成績,竟然安排學生放學後集體到某補習社上課:「咁多年嚟教育政策根本毫無方向可言,喺中學教書嘅單係應付行政工作都做得要死,有料嗰啲都會諗不如出去搞補習仲好啦!更加唔好講啲學校同家長學生自己,點樣只以成績為本;過往啲學校老師,點會默許甚至鼓勵學生去補習,反過來證明自己無用先得架!」

但今日的教育界,卻真確實如此。

(撰文:范中流)(黎則奮Q仔fb專頁圖片)

請支持我們持續發展,透過PayPal或其他方法贊助我們!
金額:
分類:|發表於2015年10月8日 下午8:12

發表評論

讀取中…
【852talk 】飲鉛水延年益壽 吳亮星分分鐘入得MENSA