林木木網誌│安心宵夜

可能因為自小係「港島人」，也可能看得太多黑幫電影，亦可能自小都覺得旺角是「龍蛇混雜」的地方，所以，極少去旺角。

數吓手指，應該有十年沒去過。

雖然朋友常說花園街兩旁的時裝店，久不久會有意想不到的驚喜（無論是款式抑或價錢），也說旺角有很多好味道的小店、特色精品店，如果有心買波鞋，旺角能找到的款式，還一定比銅鑼灣多……，一連串誘因，卻依然沒法令我踏足旺角。

直至最近，因為睇show，去了一次旺角。

那天散場之後，已經十二點幾，想吃宵夜，便在場館附近找。走到一家名叫「牛精佬」的茶餐廳，伸長頸看看，好像不太「恐怖」，便走進去。

坐下之後，侍應姐姐遞上餐牌，很落力介紹宵夜食品。問她問題，她非常耐心地回答。以為只是一個半個侍應的服務態度咁好啦！咦，又唔係喎！個個都幾好喎！

之後心血來潮想喝熱杏霜，問其中一個侍應姐姐，她可能是新來的，不肯定有沒有，便立刻幫我去問水吧，然後跑回來，好像比我還要高興地點頭說：「有呀有呀！真係有呀！」

可能那天晚上特別好運，餐廳裡面的食客都非常斯文，人人叫侍應姐姐都「唔該前唔該後」，跟我腦海中的旺角──呢，二話不說就有人反檯嘅那個旺角，很不同。

餐廳的食物水準，中上啦！不是特別好，但也不差。像那晚我和朋友都點了的肉碎蠔仔泡飯，幾足料o架！味道也不錯。朋友說他從前也在這裡吃過下午茶餐，炒飯份量好足，夠晒飽。

看來「牛精佬」並不牛精，雖然辜負了它的「美名」，但其實是令我吃得很安心的一次旺角宵夜。

推薦：肉碎蠔仔泡飯

地址：旺角豉油街60號，新寶戲院附近

在照片中可能看得不清楚，因為蠔仔都沉底，其實好足料。

還有好多宵夜選擇，本來想食豬手飯添，但怕肥，放棄。

呢杯就係侍應姐姐好高興發現餐廳真係有嘅熱杏霜。

餐廳於凌晨三點才關門，但早上六點四十分已經有早餐食，營業時間好長。

「牛精佬」裡面．卻有一班溫柔、有禮的侍應姐姐。