Leo Choi網誌│輕談聯賽真假榜首

球季即將步入冬假，歐洲球隊們都盡最後努力爭取衝過半程終點。首先就有法國甲組班霸巴黎聖日耳門喺國內不敗兼拋離對手15分，提早鎖定冬季冠軍，然後就有德國甲組超級球隊拜仁慕尼黑選擇放低不敗包袱，喺聯賽輸畀慕遜加柏初嘗聯賽敗績，不過兩隊實力超班，相信亦不愁跌出榜首啦。

至於西甲兩支曾經雄據前列嘅球隊切爾達同維拉利爾，亦開始頻頻失分畀拉科魯尼亞，華倫西亞等等嘅同級對手，令西甲逐漸回復到「三頭馬車」爭霸嘅局面。巴塞隆拿、馬德里體育會同皇家馬德里三隊只差4分，但三隊「西超」亦開始拋離其他「西甲」隊5分咁少，相信拋離嘅距離將會越來越遠。

英超方面，另一隊異軍突起嘅球隊就似乎係真材實料：李斯特城今季只係輸畀暫列第二名既阿仙奴，暫列榜首。射手「華dee」華迪雖然打破聯賽連續入球紀錄（11場）之後斷纜，但攻勢仍然停不了，上場助攻返畀助攻王馬列斯，幫助佢大演帽子戲法，三球掃走史雲斯，可見「狐狸」攻擊模式靈活多變。星期一凌晨四點，李斯特城面對攻擊力減弱嘅落難班霸車路士，相信會有一場精彩既攻防戰。

（圖片來源：李斯特城FB）

==============================

（立即Like「Leo吹」fb專頁：http://facebook.com/LeoBlowHK）