常月明網誌│無私的愛

【聖誕呈獻】852年度𤓓人選舉

2015-12-26 08:05
字體: A A A

嗚呀~正所謂一年容易又年尾,《852郵報》都同大家回顧吓,邊個又召喚咗阿寶出嚟。事不宜遲,即數「852年度𤓓人選舉」候選人。

1. 葉劉淑儀
身為前保安局局長嘅葉劉,過年前就先開錯有毒電郵,被黑客冒簽名去瑞士銀行偷咗50萬;到年初二跟隊去車公,又被隻麒麟撞到成個飛起,仲要畀人暗串係自己硬要攝位先出事。玩到咁上吓又到政改表決嘅一日,葉劉跟咗大隊出去諗住玩流會,結果流會不成兼冇投票贊成議案,翌日上電台時,就淚灑直播室。

人玩臉書佢玩臉書,葉劉連自己照大腸都要開心些牙,連自己身份證號碼都曬埋出嚟,跟手又要個臉書管理員出嚟鯁晒成件事。之後,現任政制及內地事務局副局長陳岳鵬升官晉爵,都畀佢講成係好多年輕人當佢係跑道,但觀乎網友話唔想葉劉幫佢哋起機,怕且葉劉有時都係諗多咗!

2. 梁唐青儀
貴為香港嘅第一夫人,梁唐青儀由去年年底已憑一身龍蝦裝,成為網民寵兒,而今年佢同愛女齊昕BB更造福萬民,提供大量花生。今年1月中親身上陣做「青少年軍總司令」,帶領一眾年輕人宣誓「報效祖國」,但原來梁唐青儀自己嘅子女就搞唔掂,3月中被愛女爆大鑊,話畀阿媽打兼用粗口問候,連call白車都唔得,又多次留言大罵老媽子,結果齊昕BB要離港避世。去到年尾,齊昕BB總算成功上映「公主復仇記」,萬聖節當晚當住傳媒連車阿媽兩巴,再伸佢出的士,梁太唯有自己搵路返禮賓府。

3. 吳克儉
高登有云「月尾發功」,人稱「唔得掂」嘅吳克儉亦深明此道,一場TSA風波就成功搶佔數之不盡嘅新聞版位,先係以「私人理由」唔去公聽會,跟住畀人踢爆原來去咗日本睇紅葉,但佢依然喺出席活動時好似開籠雀咁講遊日攻略。到臨近聖誕,佢又出memo畀學校,話唔准操TSA,聲言違規嘅學校會受處分,激到兩大校長會反面拍枱,結果又渣渣臨縮沙,拋返個波畀家長,無負「唔得掂」之美名,都唔好話佢之前先話自己月讀30本書(但原來六成係雜誌)!

4. 盧寵茂
聖誕節,唔少團體都叫大家問候一吓身邊嘅友好親朋,但盧寵茂都可以話係「問候」嘅反面教材。今年港大副校長遴遴選風波,各校委據講都用「非凡創意」諗出原因,其中盧寵茂就被指講過,7月底佢老哥喺校委會議跌倒後,陳文敏冇問候佢!但睇返條片,只係見到佢自己直插落地,無端端又變咗成個風波入面嘅其中一個羅生門,仲引咗張敬軒同狄易達等做相同pose向佢「致敬」,做大學教授都冇呢吓咁威。

雖則盧寵茂喺今次遴選風波上咁奮不顧身,但北大人素來公正嚴明,話咁快阿盧教授就被大陸嘅學術網站舉報佢涉嫌抄文,佢推說話係篇文係啲研究生寫嘅,不過就引伸另一個問題:原來佢只係得個名?

5. 屈穎妍
香江撐警藍絲第一健筆屈穎妍女士嘅「文人風骨」,向來得萬千網民嘅「欽敬」。4月頭警方誤拘智障漢謀殺,屈女士竟寫道智障漢「頂多受苦72小時」,惹來公眾炮轟後,就自言「恥與明報為伍,講完!」宣布唔再為該報寫專欄。卻原來而家,佢已轉投網媒大亨周融搞嘅《香港G報》及其他新媒體。

另外,佢夏天一篇「廢青扇」大作,引發網民唔少討論之餘,亦為呢把男女老幼幾乎一人一把嘅風扇仔正名。之後,大家立即搵到原來佢夫君都用過,又發現原來佢鍾意帶啲囡囡去商場嘆冷氣。一文引起千重浪,你又得唔得?

6. 國際GEM
獲封中國Taylor Swift,外號「國際GEM」嘅鄧紫棋真係威到上太空。去新城頒奬禮要全世界等佢,卻又畀人踢爆疑似講大話。到開演唱會又賣天價飛兼規矩多多,賣條「太空手帶」盛惠280蚊港紙,但本報又發現原來淘寶五蚊人仔有交易,都唔講有其他演唱會都會只送不賣。

之前一直都係香港人話國際GEM人紅耍大牌,只顧大陸市場而當香港人冇到(連《文匯》娛樂都咁講!)點知去到3月,就連國際GEM嘅成名地──湖南衞視嘅《我是歌手》都插佢耍大牌,結果被飛出雙年顛峰會。到年尾世界巡迴演唱會,消息就指佢倫敦個唱劈至0英鎊都無人問津,結果要派飛搵人睇,最慘係佢後來拍片澄清,都唔多能完全回應網友嘅質疑。

7. 薛國強
團結香港話難唔難,睇呢位阿哥就知。8月中向城規會提出鏟走中區電車,全改為馬路,香港社會不論左中右一致叫唔得。最有趣嘅係其實薛國強冇乜點坐過電車,而提交城規會嘅計劃書並無任何數據支持,單憑佢一句「我行路可能快過搭電車」就想取消電車?施主係咪諗多咗呀!

8. 鄭智
一個人何為之有成就?網民為佢創作句子都可以算係其中一種,中國國足隊長鄭智就係人辦。足球講公平競技,但鄭智就被港隊門神葉鴻輝踢爆佢鬧人係狗,兼夾「放飛劍」。鄭智唔認之餘,國足又兩循環都贏唔到港隊,出線亞洲區十強機會同吳克儉嘅民望有得比,結果獲網民賜潮語卡「做人不要太鄭智」。縱然之後成功帶領廣州恒大三年內兩奪亞冠盃,但亞洲足球先生嘅殊榮都要拱手讓予手下敗將。

9. 經民聯
有時樣衰呢樣嘢,一單已夠數。經民聯喺政改表決嘅關鍵時刻,竟然諗到要玩等埋發叔,叫成班建制派離場,冀製造流會,好讓立法會稀客劉皇發返嚟投票,點知冇人守尾門,走漏八個建制派,結果令到政改方案以28:8,高票被否決。始作俑者經民聯卒之要飛車去西環道歉,提出玩流會嘅林健鋒事後被扑咪時又流馬尿,但被質疑跟葉劉個timing miss晒。而家經民聯下年立法會選舉究竟要唔要找數,實在令人期待,事關「出得嚟行(行出議事廳),預咗要還」!

10. 亞視
你問香港人,香港有幾多個免費電視台,其實係一個複雜嘅問題,因為明明有兩個,但實質又只係得一個睇得上眼(都有好多人係兩個都唔睇嘅!)大家或者已經唔記得幾耐未睇過亞視。不過今年有關亞視啲新聞就由年頭帶到落年尾,其中喺愚人節前一日,亞視新聞竟然自己傳出港視王維基擬收購亞視,點知24小時唔夠,王維基就發聲明否認;搞到政府唔知係咪好驚王維基堅係買亞視,愚人節翌日就宣布亞視不獲續牌,正式判亞視死刑。

雖則冇牌,但亞視永遠嘅神話延續,繼續話有新老闆注資,仲話大展拳腳,廣招賢能「打造」「三亞平台」服務香港,只係大部份香港人都唔知何謂三亞平台啫……不過臨近年尾,又一度傳出亞視新老闆司榮彬疑似冇錢找尾數,一直為亞視仆心仆命,兼因欠薪而犯官非嘅葉家寶,都因為亞視再欠薪而要辭執董個位。

講咗咁耐,梗係預大家一份!誠邀大家喺下面投票選出今年「𤓓中之𤓓」,每人最多可投3票!去嘞!

(圖片來源:GEM fb、蘋果日報、無綫直播截圖、香港電車及YouTube截圖)

請支持我們持續發展,透過PayPal或其他方法贊助我們!
金額:
分類:|發表於2015年12月26日 上午8:05

發表評論

讀取中…
陳頌紅網誌│聖誕老人不會來