俞琤辭任商台副主席 續牌仍在商討中

法政匯思

-法政匯C

係唔係睇一班法律界嘅SOLIT同BAR現晒青筋講捍衛乜乜、捍衛物物有時睇到怕?其實佢哋都要搵食要行街要飲嘢要睇戲要睇電視要睇報紙要做人仔女要做人男友女友要做人老公老婆要做人老豆老母。想知佢哋唔現青筋嘅時候搞乜同諗乜?法政匯C話你知!

法政匯思網誌│證婚律師

2015-12-24 14:30
字體: A A A

又到聖誕,又到聖誕……相信大家都會放假輕鬆吓,律師當然都唔例外,但有一類嘅律師每逢年尾假期唔止無假放,仲可能好忙,就係做婚姻監禮(俗稱做「證婚」)嘅律師喇,事關好多新人都鍾意避開夏天熱辣辣,而改喺年尾拉埋天窗,所以有做開證婚嘅律師,年尾會比較忙碌。好多人都會問,其實證婚律師要做啲乜,係咪上台噏幾句就得。好!趁住聖誕佳節,一於輕鬆唞一唞,今日唔講689,講吓證婚其實係乜解究。

首先,大家唔好睇得電影多,以為一男一女情到濃時,話想即刻結婚就結婚。喺香港,根據法例,準新人要喺結婚之前,預早先簽發一張擬結婚通知書俾婚姻登記官。登記官如果無問題,通常就會喺張通知書發出後嘅起碼15日之後,但又唔超過3個月內,發一張婚姻登記官證明書。呢張證明書可以話係一對新人嘅permit,要有呢張嘢先可以簽名註冊。星爺有一句出名對白:「如果要喺呢段愛加一個期限,我希望係一萬年」。婚姻登記官都會喺張證明書加一個限期,但短好多,得三個月,即係話新人要喺張permit發出的三個月內註冊結婚,過咗期就要再申請喇。

去到Big Day嗰日,通常負責婚證嘅律師出門口前會check清楚張結婚證書,睇吓有冇打錯資料串錯字咁,特別如果婚禮會場喺偏遠地方,去到才發覺張婚書打錯字,咁就真係「大鑊鳥」。通常律師都會帶齊「文房四寶」去證婚,即係婚書、律師名印、羽毛筆同戒指枕。頭兩項大家都明,但羽毛筆、戒指枕都要?係,事關即使新人可能事先有預備,但你知結婚幾廿樣嘢要兼顧,為防新人到時帶漏,通常律師都會帶定一set做「士啤」。

去到會場,律師就會同對新人及MC打個招呼同夾吓rundown先。例如新人會點樣出場march in,簽名註冊之前新郎會唔會先俾一個驚喜新娘子,上台唱首「喜歡妳」? 夾完rundown,新人換好衫,儀式正式開始!除咗簽紙之外,律師通常都會負責埋邀請新人交換結婚戒指同嚟個「世紀之吻」。喺嗰短短15分鐘左右嘅環節,律師就要充當住司儀,搞吓氣氛,等各位來賓開開心心咁見證新人重要嘅一刻。律師上到台,都要識執生。例如見老爺奶奶或者外父外母去咗洗手間未返嚟,就要「長毛」上身,打吓「拉布」,講多幾句,盡量「等埋老爺」或者「等埋外母」先開始註冊儀式。

唔好以為新人簽完婚書,律師嘅責任就大功告成。因為根據法例,婚姻監禮人仲要喺婚禮後嘅七日內,將其中一份已簽署嘅婚書副本送去婚姻登記官存檔,如果做漏咗,根據法例,係違法,監禮人可能要罰款㗎!好多人問做證婚律師係咪要周時走幾場,的確,遇啱一啲好日子,例如情人節,或者通勝話宜嫁娶嘅日子,要走幾場係唔出奇。上晝去尖沙咀,跟住再入迪士尼,之後再出銅鑼灣,夜晚再返尖沙咀做多場先收工,「香港一日遊」,腳骨力都係其次,最多飛的(如果截到的士的話),最緊要時間要掌握得好,因為無論上court定證婚,遲到失場係大忌。要成排人等埋你先開始就唔好喇,唔通學梁振英咁面皮厚,同新人話因為沿途見到中國五星旗,所以掛住落車影相而遲到咩!

Anyway,講到呢度,希望大家對律師證婚嘅工作有多啲了解,無論你結咗婚定未結婚,都希望你有個開心浪漫嘅聖誕節。Merry Christmas!

(撰文:光頭鶴@法政匯思)(圖片來源:蘋果日報)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2015年12月24日 下午2:30

發表評論

讀取中…
五十四年來最熱平安夜 入夜後降溫