【銅鑼灣書店】李波致特區警察信件 存兩大矛盾掀一大危機│范中流

Ed(呢啲)

-edyeah呢啲嘢啊?

一名業餘歌唱愛好者, 一名饕餮, 一名喜歡攝影的人士, 一名唏噓的廣告佬。 一名「周身刀,無張利」嘅朋友。

Ed(呢啲)網誌│京阪行(七)-倆全其美

2016-1-25 17:22
字體: A A A

咁就嚟到最後一日,一星期的旅程轉眼就完。充電與散心往往幾長日子都唔夠,所以呢日腦裏已在亂想下一站的目的地,仲有更加亂闖的行程。諗吓諗吓,也別賴床咁耐,將行李寄存在酒店,的起心肝就出發了。今日行程最主要係諗番自己有邊度想再去,有咩未試。

Rikuro’s老爺爺芝士蛋糕

起身諗自己食咩好,結果諗起嘅係行經心齋橋多次見到的甜爺爺芝士蛋糕。對比香酥嘅半熟芝士撻,我心中更愛芝士清蛋糕,最鍾意欣賞佢個種彈彈下的質感。行到鋪面,顏色紅紅白白,搭配淡黃色,已經有種溫暖,加上甜爺爺的剪影,再望望一個個烙了甜爺爺啡蓋黃身的芝士蛋糕上。唔洗再諗再望,二話不說衝入去。

揀咗一個類近吧臺位的位置坐低,可以睇到哂師傅整蛋糕的過程。係食物未嚟嘅時間,呢種望住女師傅高速快打手嘅表演,迅速逐一將糕料倒入圓模陣中,加入適量嘅水於盤中,就拎入去焗。見模中的糕料於液態時已具有彈性似的。

轉眼間職員已送出一件蛋糕與一杯咖啡,一個套餐只係378yen,抵食。芝士蛋糕輕量清新,能嘗的芝士味不多但香氣十足,比香港的始祖伊騰家少一份濃多一份鬆。唯獨我不愛的是底部的提子乾。咖啡有日式做法的香濃,卻不苦澀,細滑而不味淡。1956年至今,又是間好老店。

轉個身再行心齋橋同美國村,再走遍了兩三轉,好確認自己沒有走漏眼。最高興是發現一所件件390yen的雜貨店,文件夾,掛勾,文具,十足Justco12蚊店。但鋪中最入的位置則別有洞天,是古著區。最後,再幫同事家人朋友掃掃藥妝。

神座拉麵

行唔夠一陣,肚仔又要醫。臨走先發覺自己嚟日本無食好多好多拉麵係唔得,所以揀咗另一間係道頓掘發跡嘅神座拉麵。1986年開業,至今全日本已有超過40間分店,大阪道頓掘與千日前店為首兩間鋪,在下去嘅係較為舒適的千日前店。(有機會下次一定會去拜訪本店!)

神座拉麵最出名豉油湯底嘅美味拉麵,老闆布施正人話呢款拉麵只要食過三次便會上癮,嚟到梗係試試,睇下會唔會食多兩次就上癮。我就特登叫無九條蔥版一試其真味,上檯時有別一般拉麵的惹味香,反有種清香,聞落似不帶味精個款。望上去見到大堆椰菜,湯頭清,可一望到底,飲落甜,似住家煲菜湯可狂飲而不厭。

叉燒不錯,因湯較清甜而不見油膩,但較碎身,食落唔夠爽。麵為圓身,加上神座拉麵個碗同埋菜多的伴,勁似中式麵身,較黃亦重少少蛋味。較畫龍點睛嘅就係半熟蛋一隻,清淡的味道中有點濃稠的感覺,重身少少又不佔太多戲份。

大阪拉麵食後感,無固定湯底配料模式,好似家家都唔同咁,咁先有唔同捧場客,有唔同特色,都唔知嚟幾多次先食得哂。神座亦設無限韮菜,但我認為神座的湯底較清甜,並不需咸辣所助。濃湯淡吃,各有愛好—喜歡淡淡的,神座勁啱你。

行多兩行就無時間,要向這七天的京阪旅講聲掰。拉住行李,向JR站進發,走過不少好風光,慢慢的(其實是重重的行李拖慢了吧…)在這城市最後漫步。

実演手打うどん杵屋

搭個快車,仲撞到遊夜船同座的兩位女乘客,出閘俾旅遊局嘅人邀請做問卷。最後到機場行咗陣,順手用最後嘅彈藥,食最後一餐。行哂咁多未入禁區前嘅餐廳,最終揀咗自己所喜愛的烏冬(烏龍麵)作結。杵屋為グルメ杵屋株式會社旗下餐廳,擁有37個餐廳品牌,仲有好多飲食業甚至物流業的分公司,你話架勢唔架勢。集團已於日本 有460多間鋪,杵屋佔當中百多間,主營自家製手打烏冬,開咁勁唔知質素得唔得呢?

一去到櫥窗已經見到我嘅心水!二話不說埋位即叫,佢有雞肉親子丼加冷烏凍套餐,兩樣都比正常細份,俾食客一次過食哂兩款,仲要係我最愛添。定食套餐一上就上成份,梗係食咗個熱食先啦。雞飯味道不過不失,只係雞肉無乜鮮味,反而蛋就非常香。

食完個飯就輪到杵屋最出名最引以為傲嘅烏冬啦,其實唔洗點好味我已經會無限加分,人總有喜好偏心,在吃的層面,我就係冷麵冷烏冬。將薑蔥倒落冷麵汁中,再徐徐將麵條放落去,望住汁的水平線因幾條麵而漲起,又見白麵因黑汁而染色。把麵雪雪聲送入口,唔夠2分鐘,個麵已清空。我差點連啲汁都想乾咗佢…講番個烏冬,煙韌爽口,好耐都未食過咁正的烏冬,唔係個親子丼頂一頂肚,同考慮埋就上機,我會叫多份嚟食。

食完行下又執兩堆零食手信,再慢慢去登機,轉眼就到了香港。

這一趟旅程若算開心,便是無負這一生—《落花流水》。散心之旅就此結束,打一打這篇七天遊也用了我大半年的時間,雖然很多時都是公事忙而忘或懶,但真的每次打起也會想起這初次一人旅行的感受,心時靜落,亦時沸起。

靜,是晚上淡淡走於日式街道的漫,是下雨潑身進去食店所送上的湯,是列車中搖晃卻不噪的禮。沸 ,是知道我急於去下一站。哪一天我會再飛?

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年1月25日 下午5:22

發表評論

讀取中…
去年無線亞視「續牌」已打破「一年慣例」 商台新城牌照仍存變數│甘樂宜