溫水劇場|亞視真係永恒

Leo Choi(Movewheel)

-Leo吹

一個大專設計仔,旨在吹吹球壇樂壇,分享對香港嘅所思所想,然後引你睇。 FB Fanpage: https://www.facebook.com/LeoBlowHK

Leo Choi網誌│關於亞視碎片般回憶

2016-3-4 18:58
字體: A A A

喺Leo吹嘗試寫咁多足球文章之後,其實我亦都心郁郁諗過開拓其他話題,不過坤哥橫掃新人獎嘅熱潮,毛記電視勁曲金曲嘅熱潮,我都一一錯過咗。而今日,本來想討論新界東補選嘅宣傳,我反而決定寫一寫,關於亞視嘅小部份回憶。

落筆嘅時候,又係傳聞亞視將會停播嘅時候。早喺二月開始流傳停播嘅時間,我喺instagram開始一個懷念亞視嘅project @atv_fun,一來每日一post講下亞視嘅回憶同最新消息,二來如果出post出到4月1號,咁樣會有58個post,一年換一日,都幾有紀念性,可惜連今日都未必過到,而收視目標,亦都係向亞視致敬,向零Like零Follower進發,千祈唔好關注呀。

關於亞視嘅亂局,我亦都唔多講幾句啦,因為好多人都想佢快啲執,我都係,無謂浪費大氣電波啦。

對於亞視嘅回憶,初初最記得係佢哋嘅兒童節目,當時亞洲電視兒童台呢個全部由小朋友主持嘅節目仲會請小朋友玩playstation2,連兒童節目都有能力走喺時代尖端。

而遊戲王、索斯機械獸、(永遠只播頭52集嘅)海賊王,更加係動畫經典,玩具產品一樣可以同無綫動畫一樣大賣,亦有一少少動畫雖然未有玩具產品,不過故事概念都係一流,例如電腦歷險記、爆鬥宣言、光明勇士(又譯做聖石小子)等等。

到夜晚嘅時間,百萬富翁更加係必睇嘅節目,從此亦令我愛上遊戲節目,之後嘅以一敵百,都係非常好睇。綜藝節目,就有開心大發現,主持之間家庭式而且現實嘅互動,通通都流露咗亞視之間嘅人情味,大台嘅節目,未必隨時搵到。

細細個未識捱夜睇波,歐聯就係亞視最後一個大型足球比賽,當年最後一場比賽,2006年決賽,巴塞反勝阿仙奴,我錄起咗,keep住隻碟三到四年。呢場波見證巴塞不放棄精神,亦見證兩間球會嘅興衰轉變,巴塞建立地上皇朝,阿記淪為爭四狂魔。

旺旺入主嘅年代,係我睇得最多嘅年代,改編台灣節目嘅香港亂噏,每晚輕鬆活潑講政治,抽政治嘅水,開拓我嘅政治觀。亞洲星光大道(一至三季),就係亞視最後一個造星嘅節目,曾寶儀同林曉峰主持相當合拍,好有爸爸媽媽嘅感覺。

而羅力威係最後一個由亞視送入娛樂圈嘅人,總算留低到一兩首代表作,例如現實不重要,雙子情歌等等。當羅力威一走,亞視格硬棒嘅亞軍之子……亞洲之子亢帥克,都未能夠咁紅,仲被迫幫亞視做咗好多多餘嘢。

我亦都好慶幸曾經入過八號錄影廠睇過節目錄影,做吓現場觀眾。不過當時人流已經唔多,而家人去樓空,相信情況更加堪虞。

最後要提提勇奪首屆港超聯轉播權,係我最後一個會追嘅節目,主持們專業嘅資料搜集,亦令我好欣賞佢地嘅專業,亦加深左我對本地波嘅了解,見證咗亞視人嘅敬業樂業同埋熱誠,不過隨著不獲續牌,亞視嘅大型製作亦都到此為止啦。

我哋都曾經嘲笑過,無視過,亦都欣賞過,感動過。呢個電視台其實應該結束喇,接手模擬頻譜嘅港台電視同埋接手數碼頻譜嘅viuTV,絕對會比現時嘅亞視重播節目質素好好多,節目將會更多元化。

喺度期待新台出現既同時,希望各位亦都留低一絲嘅感謝,多謝曾經為亞視盡心盡力,真正感動香港嘅各位亞視人啦。

(圖片來源:亞視電視截圖)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年3月4日 下午6:58

發表評論

讀取中…
源視物語:楊岳橋點樣證明當選冇僥倖?