溫水劇場|【私人感受】+【真人真事】

Leo Choi(Movewheel)

-Leo吹

一個大專設計仔,旨在吹吹球壇樂壇,分享對香港嘅所思所想,然後引你睇。 FB Fanpage: https://www.facebook.com/LeoBlowHK

Leo Choi(Movewheel)網誌│港超聯冠軍已定?仲有嘢睇!

2016-3-12 12:59
字體: A A A

香港超級聯賽進入最後直路,有人話冠軍大局已定,我哋又一齊睇吓仲有幾多精彩焦點。

東方今季未有重大失誤,受惠於爭標對手接連失分,優勢擴大到打少場仍然領先嘅極大距離,即將打破南華傑志壟斷近十年頂級聯賽錦標嘅局面,餘下目標相信就係能否以全季不敗。數數手指,唔駛計對賽往績,分數上仲可以提早兩場奪冠呀。

順帶一提,東方足球隊以外,東方籃球隊亦以首支香港職業籃球隊身份進軍籃球甲一聯賽,第一場比賽仲喺籃球高級銀牌賽擊敗傳統勁旅「黃金兵團」永倫,實行同永倫,南華三足鼎立。「東方皇朝」勢必衝擊本土籃壇足壇。

講返足球,傑志雖然可以「雙殺」南華,但頻頻對中下游賽和失分。南華就選擇直接向爭標對手投降,聯賽同時輸俾傑志,東方,連面對跌落中游嘅飛馬亦輸兩球。

亞協盃亦顯出南傑雙雄頻密征戰嘅疲態。而個別球員表現亦係唔得掂架,包括傑志頻頻失機,取代巴倫古素嘅新外援「魯芬」盧芬奴,以及提早申請紅牌離場,導致南華大敗嘅南華後防車潤秋。長遠落去,積分甚至會影響未來香港代表喺亞洲賽事嘅資格添,可謂進退兩難。

至於中游方面,南區面對二月嘅魔鬼賽程之後,險勝同樣中游嘅飛馬,對賽往績取得優勢,並且進佔第四。夢想駿其就表現反覆,各項賽事四連敗。三隊聯賽差距2分,邊個能夠衝擊較前位置,對爭取季後賽資格有極大幫助。好似上年傑志,東方包攬錦標,搞到連第五都可以後補打季後賽,仍然足以打餐懵。

最後講港超聯嘅護級大戰,一講護級,除咗分數,其實戰術同策略都係次要,係睇球隊精神面貌同士氣。上季嘅護級戰有大埔長期擔任underdog,全季捱打之下,季尾打敗黃大仙,「吊頸都抖吓氣」,最後難逃降班命運,而大致上安全界線就係12分咗右。

今季三支護級隊都喺聯賽已經打開勝利之門,最後先打開勝利之門嘅黃大仙,就選擇咗擊敗中游嘅南區(2:1)同夢想駿其(3:2),仲以經典嘅「落後,反勝」方式拎走6分,士氣頓時急升。對一隊護級隊嚟講,反勝,連勝,士氣大增同時發生絕對係一份天賜嘅禮物,黃大仙似乎就祝福咗黃大仙嘅球員啦。

至於靠擊敗護級對手搶分嘅兩隊,元朗兩對頹勢嘅南華,雖然作客輸咗,但可以主導比賽攻勢,更加喺主場逼和南華,又係對士氣大大幫助。流浪作為盃賽專家,可以喺盃賽擊敗傑志,東方,證明喺盃賽嘅強勢。不過同時晉身聯賽盃同菁英盃四強,亦將會係流浪嘅後顧之憂,流失教練列卡度之後,點樣分配兵源於聯賽同盃賽,教練甄力健一定十分頭痛。

三隊相差3分,命運仍然係福禍難料,要重現2013年「港甲大審判日」:最後一輪聯賽6隊揀1隊降班嘅畫面,仍有機會發生。所以話,港超聯仍然火花四濺,點會無嘢好睇呀?

(圖片來源:香港超級聯賽 Hong Kong Premier League fb)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年3月12日 下午12:59

發表評論

讀取中…
穆迪調低港主權評級點名提《白皮書》 曾俊華:我們將會受惠於內地經濟結構的改變