陳頌紅網誌│自我陶醉的錯覺

謝頌昕

-呃你十年

人,最易寫,又最難寫。即管寫寫看,說中了,就俾個LIKE;說不中,就當我呃你十年吧!

謝頌昕網誌│《選老頂》:那天早上,我唔見咗60蚊

2016-4-4 20:50
字體: A A A

是這樣的,《選老頂》第二日(2日)正式公映,我就即撲九點早場戲飛捧場,喺戲院逗留咗個幾鐘,我只有一個問題,有冇人可以畀返嗰60蚊飛錢我?

電影情節大約就係杜汶澤放監出嚟,適逢社團選「老座」,決定參選,但遇上後起之秀王宗堯,喺社團嘅小圈子選舉下,江湖展開連場明爭暗鬥。

故事係點都屬其次,問題係點解有咁多偶然?杜汶澤咁啱遇上性感舞孃,同人一夜情,咁啱佢鍾意占卜,咁啱卜到佢會做社團「老座」,於是杜汶澤就咁啱地決定出選。之後,又咁啱姜皓文個女返香港,叫佢跟自己返英國,而姜皓文又好易話為咁同意咗。點解部戲咁多嘢都可以用「咁啱」解決就算數?

另外,整部電影開咗好多條線,包括杜汶澤出冊後同家人嘅關係、姜皓文個突然出現嘅女,等等,但樣樣都冇頭冇尾,例如杜汶澤起初同個仔溝通唔到,之後阿仔就好順口咁叫佢做爸爸,咁中間經歷過乜?同佢決定選「老座」又有咩關係?姜皓文突然有個女,對方講兩句就跟人返英國,乜事導致佢突然想有家庭幸福?幫會三個有提名權嘅大佬,除咗大L講咗句金句外,又有咩伏線?搞完成場大龍鳳,最尾嚟一場大撕殺,再由黃秋生對住個冇臉見人嘅警察,解釋個局係點擺就算,咁都得?

《選老頂》其中一個賣點係用社團選「老座」喻香港政治,從其選舉制度、警黑關係都可以睇到其用心。問題係,使唔使寫到咁明顯?係咪真係只有靠主角將所有盤算講晒出嚟,先可以表達到個message?咁同無綫劇集又有咩分別?不少出於政治人物嘅金句,都套咗落電影對白入面,的確係笑得出,只係喺呢個「有水齊齊抽」嘅社會,電影又如何能憑此突出其過人之處?最攞命係杜汶澤嘅一句「倒抽一口涼氣」,而家仲有邊個會講?2016年仲聽到有人用呢句嚟抽水,都真係要抽返一口涼氣。

說到最後,真係想問一句,有冇人可以畀返60蚊我?

(圖片來源:《選老頂》fb)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年4月4日 下午8:50

發表評論

讀取中…
陳方安生:港府管治問題致「本土」崛起 香港社會不支持港獨