即時點評│指可在港試行大陸《國安法》言論連曾鈺成亦詫異 饒戈平愧研究《基本法》至少24年

阿健

-的士佬手記

我叫阿健,的士佬一名,食塵多過你食米,揸車多個你行路。揸一轉的士,甜酸苦辣喜怒哀樂通通見齊。得閒嘅,咪上嚟聽吓我吹水囉。

阿健網誌│低胸金髮嘅神奇女俠 上車就同我講「錫你冧」

2014-4-6 13:00
字體: A A A

上星期短短一小時內,由黃雨演變成黑雨,一下子風雲變色,你都咪話唔驚。又一城天花漏水,地鐵站滲水,全城好似被風雨吹殘一樣,好彩我揸日更,但我夜更拍擋就慘啦,全晚開唔到工,唔係唔想做生意呀,係横風横雨根本睇唔清楚條路,又危險,只好泊埋一邊,生意大受影響!

正所謂天有不測之風雲,載客唔知遇到咩人……上星期就載着超人同superwoman!

話說上星期有日,載一位乘客到體育路足球會,落車時被一班海軍陸戰隊包圍住,睇清楚有幾位着住短褲,就知道當日係七人欖球賽嘅日子。

跟住途經花園道,上中半山兜客,迎面眼前一亮,嘩哈哈!神奇女俠同貓女向我招手呀。神奇女俠上車就話:「香港“錫你冧” (HK Stadium香港大球場)。」心想咁早就想錫我?其實唔使問都知你地去大球場啦,唔通車你返美國咩?其實神奇女俠有咩異能我就唔知,但睇到佢金髮藍眼,加上件性感低胸裝,已經殺傷力驚人。聽見佢同貓女係後面吱吱喳喳,不其然望多兩眼,好快就已經到咗大球場了。

佢哋落車後,跟手超人上咗車,上中半山攞啲嘢之後返回大球場。喺車上我問超人:「七人欖球好睇嗎?」

超人:「其實我都唔知道有咩好睇,我哋都係喺度講吓笑,傾下偈,飲吓啤酒,當係gathering囉。呢啲香港盛事,都係嚟認識吓朋友,大家玩吓開心吓架啫。好似頭先嗰個神奇女俠咁,如果返到去再見到佢,我都會走去認識吓佢,佢真係殺傷力好大喎。(邪笑)」

回到大球場,超人同神奇女俠已經消失咗,不過仍然有好多奇裝異服嘅人,但我嘅Toy Story仲未有出現,希望下年可以見到你啦……巴斯光年。

 

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年4月6日 下午1:00

發表評論

讀取中…
Angelina網誌│強國客人的機上創意