游清源網誌│京官向泛民訓話大披露

8仔日記│李克強真夠薑 滬港通炒味濃

2014-4-11 07:30
字體: A A A

2014年4月11日 星期五,「中港溶合」呢鋪認真「溶」!

大家好,我係8仔!

古語有云:「瞓醒吹一吹,好過俾女追!」所以,由今day開始,我8仔就會逢星期一至五,趁大家啱啱瞓醒,就同大家吹吹水,論盡香港、寶島、強國,以至這個好似患了憂鬱症的藍色星球的奇事怪事不平等,希望大家都可以在迫巴士迫港鐵迫lift,以至眼見強國人迫人太甚的時候,都可以精神番、開心番、振作番,以至有勇氣鬥一番。

 

山雨欲來炒滿城

8仔越來越覺得,總理大人李克強真的夠薑,他簡直比「音樂情人」鄭子誠一出現就有陰謀(高登仔語)還要厲害百倍。因為,他一出現,香港就肯定有大「畸屎」。之前有「818解放港大」,最近就有「滬港通送大禮」。

有個陸羽茶客方展博一路咬住嚿豬膶燒賣,一路孖住8仔講,尋日無端端做了變形俠醫,手頭上揸住的H股好似吃了過期發粉,一夜之間發大了好多。不過,方生就提醒8仔千祈唔好亂入貨,唔係就好容易一個唔覺意會真人表演「深情俯身獻菊花」,由鯉魚門賣「海鮮」賣到去江門,再賣到去廈門,一直賣到去天安門,真係執番梘都執到菊花開、開燦爛!

方生嗒完啖「死先」(水仙)之後,就叫8仔留意一件事,就是在滬港通公布前兩個禮拜,就已經有人炒H股,反映出不少人已經做了鴨(春江鴨),飲了頭啖湯。他還說,這個現象已經有一段不短的日子,不單止今次,所以都唔知梁至英要多謝中南海些什麼,莫非要多謝中南海俾機會那些假的真不了公司來港呃錢乎?

luk yu 2

炒味攻鼻過炒蟹

方生越講越有火,一邊含住嚿山竹牛肉,一邊講家陣炒緊兩類股份。

第一類自然是H股,事關H股平過A股好多(倒轉講,即是A股貴過H股好多)。他還舉例說,某隻H股的股價係兩蚊雞,但A股的股價就係八蚊雞,如此這般,那些強國人梗係會抬住一箱箱人仔落來香港炒餐懵啦。但是,問題來了!A股的股價咁高係假的真不了,H股的股價先至係真的假不了,而這件事已經是十年來的事。即是說,如果A股真的反映出真正股價,而H股又真的估低了好多,咁何解過去十年無人大舉入貨?莫非那些人一個二個飲了「死先」?

方生一錘定音話,除非A、H股會merge埋,否則滬港通的炒味就攻鼻過避風塘炒蟹,分別是絕大部分股民到頭來都避不到風,而變成辣味大閘蟹。

 

誰敢監管強國人

講到呢度,方生就話,滬港通都算有個好處,就是在中國上市的股票,其實有唔少都買得過,遲些香港及國際投資者都可以入貨,未嘗不是好事。問題是…..(佢飲緊水仙),問題是QFII已經實施了好幾年,聽講香港及國際投資者的quota都未用晒……咁即係咩?即係事有QK囉,呵呵!

講到尾,方生最擔心的是監管問題,尤其是監管強國投資者的問題。一來絕絕絕大部分香港仔,即使俾個鑼佢做膽,都不敢監管強國官二代富二代,二來他們只需派些姨媽姑姐拖住個篋落來炒H股就得,得咗!你不單止吹佢唔脹,亦都掹佢唔長。

Hermes_Birkin

公民黨慶賣袋袋

14個泛民議員今日(星期五)夜晚飛去上海,到埗已經是深夜,除了一邊沖涼一邊哼番首《夜上海》,睇怕都冇嘢做到,所謂的戲肉,始終是在安息日先至會上演(我8仔下個星期一就會寫番多少,大家到時記得就look一look)。

不過,暫時可以一提的是,京官同泛民議員單獨會面的環節,梁至英冇得留低,反而譚至圓可以戥下腳。有人就認為,阿爺完全唔俾「飛屎」梁至英。

此言差矣!8仔反而覺得,此乃阿爺十分之體恤梁至英要集中精神搞「連任辦」,實在無暇理會同泛民議員吹水這類濕碎嘢,先至叫譚至圓這件家丁搵張凳仔來坐坐,如此而已。

話得說回頭,泛民議員今次咁樣飛法,最大影響的是公民袋,事關星期五晚乃係公民袋的八周年黨慶,咁搞法,唔單止其他泛民大代唔見影,就連公民黨自身都有三件(湯渣華、郭榮幸、郭家奇)飛走埋,認真人丁單薄。

不過,雖然公民袋今年黨慶唔旺丁,但就好大機會好旺財,事關籌款環節有好多勁吸引的好東西,其中陳太娘親和採花大盜的兩幅名畫,過百萬元成交絕對不成問題。不過,8仔最感興趣的好東西,反而是愛瑪仕的「奶樽袋」Birkin究竟是由邊位捐出?

貼士:沿中環路過,好多人都這樣傳過,愛瑪仕存貨,城中有三大來源,第一個是愛瑪仕專門店,第二個是米蘭站,第三個就是某位有米性情中人。

據聞,這個「奶樽袋」已經有人認投,至於是何許人?答案是:「木宰羊!」

 

《蘋果》縮皮《主場》飢

日前本報率先披露,由於《蘋果》要縮皮,所以忍痛割捨由青年財俊東尼蔡掛帥的財經專版〈金融中心〉。行內一直盛傳,〈金融中心〉的稿費,乃係東尼蔡旗下《主場新聞》的主要收入來源,cut走〈金融中心〉,肯定會影響《主場》的營運。

關於〈金融中心〉的稿費,坊間有不同的版本,有傳是20萬一個月,亦有傳是60萬,更有傳是100萬。8仔收到可靠消息,說實際上是40萬一個月,而《主場》每個月的基本開支,聽聞是50-60萬元。換言之,〈金融中心〉的稿費,幫補到《主場》超過三份之二的開支(屈指一算,過去兩年,差不多等於一千萬元)。

如今稿費一去,意味東尼蔡每年要籌500萬先至落到樓。不過,對於東尼蔡的吸金力,8仔充滿信心,還請各位《主場》粉絲放心。

各位,下星期一再吹過。這個周末,大家最好去吹吹風,正是古語有云:「清風送爽,好過開房也!」

 

(開版原圖來源:TVB新聞台截圖)

請支持我們持續發展,透過PayPal或其他方法贊助我們!
金額:
分類:|發表於2014年4月11日 上午7:30

發表評論

讀取中…
從林飛帆身上的佔中Tee說起 建制派污名化成佔中「死亡之吻」