九評香港大學生的鴇母龜公論│桑普網誌

監警會委員幫梁拉票  陳茂波策動周圍派表│彭鐵穎

2016-6-3 18:45
字體: A A A

商界盛傳,一眾梁粉已經幫緊梁振英搞連任工程,好似話監警會委員、「幫港出聲」成員、早前話李波是「半自願」返內地的錢志庸律師(中),最近就周圍問人「表你有冇」?

是咁的,錢志庸最近周圍同人講,早排梁振英、陳茂波牽頭成立了一個專業人士組織,好想同各路專業人士一齊高歌《跟佢做個friend》,所以就派張表俾大家填寫聯絡資料,最好整番個WhatsApp群組,等大家可以不時聯絡一下感情咁話啦!

最妙品的是,錢志庸拍晒心口話CY肯肯定可以連任,所以派表並非為他拉票。咦?咁都得?唔怪之得那個什麼「一帶一路夜蒲團」的成員翁繼文都可以擘大眼講大話,話那間「音樂在線」的「藝員」是穿長袖衫的了(講開又講,聽講有位錢先生都有去唱K呢!)

大家或者對錢志庸感覺有啲陌生,咁我哋就介紹返啦。佢老哥係反佔中大聯盟嘅成員之一,兩年前嘅佔領行動嗰陣,曾經話要協助商戶「苦主」以法律途徑追討賠償,建議向最容易控告的團體入手,因為「告街邊嗰啲人係冇意思」,不過當時佢係唔多講得出發起佔領行動嘅組織係邊幾個,要隔離嘅周融提水。

去年港大副校長遴選風波入面,有校委會議內容被偷錄外洩,錢志庸就撰文批評破壞保密機制會令港大成為「無掩雞籠」。對於學聯前常委梁麗幗就政府政改諮詢申請司法覆核,錢志庸又話有關行動係要推翻《基本法》,立心要將香港推向無政府狀態。

不過錢志庸最爆嘅言論,自然係銅鑼灣書店股東李波失蹤期間,曾於《大公報》撰文,指無論李波有何國籍,只要大陸當局行使《中國刑法》,就有權拘捕李波。

(撰文:彭鐵穎)(圖片來源:錢志庸律師行網站及《蘋果日報》)

請支持我們持續發展,透過PayPal或其他方法贊助我們!
金額:
分類:|發表於2016年6月3日 下午6:45

發表評論

讀取中…
【七警案】無綫職員稱事發片段接收時無礙 曾健超料下周作證