曾鈺成笑言70歲可做美國總統 當特首則年紀太大

銀水 -的士大哥

-的士大哥

細個志願做機師,成日發夢發達之後唔使做,點知最後做咗個日踩十二粒鐘嘅的士司機。最鍾意就係吹水唔抹嘴,日日揸的士咁多「奇遇」,不如就喺度同大家分享揸的士嘅所見所聞。

乘客自言自語性情大變點算好?│銀水│的士大哥

2016-6-11 12:00
字體: A A A

上星期同大家講到,我有一晚車咗對「情侶」去曳曳,其實除咗呢類客人之外,仲有一種人我哋都係見怪不怪嘅,嗰種就係「古怪乘客」啦。

好多時睇新聞都見話香港人壓力大,可能因為咁,我都車過唔少精神好似有問題嘅客。試過有一次,見到有個女人等的士。佢都屬於高高瘦瘦、斯斯文文,總之係會令人眼前一亮嘅類型啦!之後佢上咗我架車,但我就冇特別同佢傾計,隔咗一陣,反而就聽到佢「自己講嘢」。

哦,原來佢傾緊電話,咁更加唔好打擾佢啦,咪繼續揸車囉。忽然之間,我聽到佢問咗一句:

「你話係咪呀?」

不過,同佢傾緊電話嗰個人好似一路都冇應佢,個女人似係等緊我答。唔……可能係問緊我嘢掛,但我又唔知佢問緊我啲咩,正想追問嗰陣,聽到佢自己答:

「咪係囉!」

原來佢只係自言自語,自問自答。其實呢啲客人平時都載唔少,唔係影響到我咪冇所謂囉。之不過,差唔多到目的地嗰陣,個女人忽然大叫:「轉左!」

嘩!佢忽然大叫真係嚇死我。明明佢要去個目的地都唔係轉左,咁梗係問吓佢係咪想轉目的地啦,正想開口問嗰陣,佢用一種好惡嘅語氣大聲命令我:

「轉左!我叫你轉左就轉左!」

雖然話人不可貌相啫,但點都估唔到個女仔望落咁斯文會粗聲粗氣!我唯有跟佢指示轉左停車啦,仲想畀人鬧咩。點知停咗車之後,個女人又變返好斯文,畀錢嗰陣仲好溫柔咁講「唔該」,好有儀態咁落車。

諗返起呢件事,都覺得自己嗰次好似載咗兩個人咁。唉,所以話,香港人雖然壓力大,但都係放鬆啲啦!

(圖片來源:蘋果日報、網上圖片)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年6月11日 下午12:00

發表評論

讀取中…
【那年我21歲】魏綺珊:由「讀電視」變「做新聞」 畢業後流浪歐洲發現「做新聞記者都不錯」│方浩文