【銅鑼灣書店】田氏兩兄弟看林榮基言論 一個信一個唔多信

銀水 -的士大哥

-的士大哥

細個志願做機師,成日發夢發達之後唔使做,點知最後做咗個日踩十二粒鐘嘅的士司機。最鍾意就係吹水唔抹嘴,日日揸的士咁多「奇遇」,不如就喺度同大家分享揸的士嘅所見所聞。

唔見嘢? 識到我銀水就好彩啦!│銀水│的士大哥

2016-6-18 12:30
字體: A A A

相信好多人都試過搭的士時漏低嘢,但搵唔搵得返,都好睇彩數。今次就同大家分享一個關於失物嘅故事。

我有個熟客叫文哥,佢好多時要搭的士都會call我去車佢。有一次,文哥打嚟話而家喺機場,想去觀塘,咁啱我又冇客,就過咗去車佢啦。揸車時,我同佢都好似平時咁傾吓大家近況。傾吓傾吓已經到咗觀塘,佢落車之後,咁啱又有個客截車,話想返機場。(嘩,今次真係「發」囉!)

之但係,喺車呢個客返機場途中,我又再次收到文哥電話。

「喂!我好似漏咗部電話呀,你幫我搵吓呀。」

唔係啩,電話都可以唔記得拎?收咗線之後,我就趁等紅綠燈嘅空檔時間,由倒後鏡望吓文哥部電話喺唔喺後面座位。不過,我望咗好多次都冇,唯有開聲問一問個客啦。

「唔好意思呀,頭先有個熟客打嚟同我講,話頭先好似漏低咗部電話喺我架車,你可唔可以幫我睇吓見唔見呀?」

「冇喎!」

既然搵唔到,只好打返畀文哥,同佢講話見唔到漏低,問過車上個客都話冇。但文哥講到好肯定留咗喺我度:

「冇理由喎!我明明漏低咗喺你架車度。我已經搵過晒個袋都搵唔到,而家都係舖頭借電話打咋,幫吓手啦。」

聽到佢咁講,又唔好意思推佢,唯有應承再幫佢搵吓啦。收線後,我就將架的士停埋一邊,同個客講想落車去後座搵一搵。好彩對方都好配合,但我親自搵過,都係搵唔到。呢個時候,我就開始懷疑係呢個客搵到,再自己收埋咗!呢啲客都真係見唔少……究竟有咩方法可以令佢交返部電話出嚟?

之後,我就去返司機位繼續揸車:「唉,真係冇喎……咁都冇辦法啦,唯有同個熟客講搵唔到,可能佢都係自己唔知擺咗邊,未搵清楚啦。」「你知啦,而家手機好重要㗎嘛,又save咗好多朋友電話,如果冇備份,忽然之間唔見咗都幾麻煩呀。」

見個客開始附和我,我就再加多兩錢肉緊:「不過冇晒啲朋友嘅電話號碼都事少啊,最怕冇晒啲相!我呢個熟客啱啱坐我架車時先同我講,話最近個女出世,幫佢影咗好多相,如果冇咗部手機都唔知點算!」

「不過而家唔見咗都冇辦法啦!可能畀人偷咗都唔定,只可以話佢唔好彩……」

傾多陣,已經去到機場,趁個客落車走咗,我梗係去後座徹底搵多次啦,最後終於喺地毯一個角落搵到!文哥知道之後都好開心!

雖然始終都唔肯定係咪個客收埋咗個電話,但好多時,啲嘢係你嘅就係你嘅,唔係你嘅就點都唔會係!大家搭的士又好,搭其他交通工具都好,都要小心自己嘅貴重物品呀。

(圖片來源:蘋果日報)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年6月18日 下午12:30

發表評論

讀取中…
中共就算為求目的,也應先跟港人不容自由受損的遊戲規則│丘偉華網誌