游清源網誌│借民國喻今

8仔日記│宗師、拳師、財政司 溝通、龍通、滬港通

2014-4-14 11:36
字體: A A A

2014年4月14日 星期一 特區有屎人 香港有史詩

昨晚,香港有兩個人瞓唔著,一個叫張家輝,一個叫梁朝偉。

張家輝瞓唔著,因為太興奮;梁朝偉瞓唔著,因為《一代宗師》幾乎囊括晒香港電影金像獎所有獎項,只係差一個影帝。

我信攞獎攞到手軟的偉仔本來不介意,但以他追求完美的個性,眼見《一代宗師》因為他而得不到一個完美句號,少不免都會飲多幾杯悶酒吧。

關於呢個影帝寶座,《一代宗師》輸俾《激戰》,最容易搞的爛gag,就係一代宗師輸俾一代拳師,就係葉問輸俾賤輝,甚至就係周慕雲輸俾化骨龍(真名「史伐龍」),哈哈(一點也不好笑)!

不過,8仔寧願話,呢個葉問之所以會輸俾嗰個賤輝,一句到尾,就係「第一代新移民」輸俾「新一代本土撚」。張家輝飾演的過氣拳王畢竟較為容易引起英雄遲暮的香港電影人的共鳴(順帶一提,香港電影金像獎選舉其實都係小圈子遊戲,而且透明度仲低過黑人黑夜捉烏鴉,稱得上係「有中國特色的香港選舉」)。

 

馮檢基笑賣A貨

pan democrats and wong kwong ah

(圖片來源:nowtTV、有線新聞截圖)

昨晚瞓唔著的,查實仲有一個人。

對唔住,應該係一個「真人」至啱。

不過,呢個「真人」的意思,不是指道家的得道高人,而是指比猿人稍為進化的人形物體。

他,就是馮檢基。

話說老馮拎住本內藏「三軌制」的巨型《基本法》送給港澳辦主任王光亞,殊不知卻被王光亞含沙射影的指出那是「A貨」(贗品)。不過,8仔不是說老馮因為俾老王揶揄而瞓唔著,而是說他過度興奮而輾轉反側典床典蓆。各位,不信就不妨翻看老馮即使俾老王當眾撚化,依然笑口噬噬的新聞片,就知8仔所言不虛(講開又講,王光亞的煙屎牙好覺眼,而佢響車上煲嗰支「事後煙」,又的而且確好易令人以為他剛剛從「理想酒店」走出嚟囉)!

總之,老馮帶出了一個諾貝爾醫學獎得主都解決不到的深奧問題,就係――人的面皮究竟可以有幾厚?

 

鬍鬚曾當「規矩」係「老舉」

john tsang

(圖片來源:財政司司長網誌)

鬍鬚曾昨日在他的網誌話,上個星期四上晝九點四十分,當他出席立法會預算案二讀辯論之際,「同事告訴我特首從博鰲來電,有急事要找我商討。我知道『驚喜』真的來了,即時離開議事廳給特首回電。十五分鐘之內,金融服務科的相關同事已經齊集在立法會大樓的112室,收看李克強總理發言的直播。十時三十二分,總理宣佈中央將積極創造條件,建立上海與香港股票市場交易互聯互通機制。十時四十分,港交所停牌。我重溫和微調預先準備好的講稿後,在十一時十分會見傳媒,清楚告訴市場『滬港通』的進展,避免猜測」。

呢番說話好有問題,隨便數數,就有五點。

第一點:鬍鬚曾既然一早知道呢個「驚喜」,就有責任叫港交所一早停牌。

第二點:8仔翻睇嗰次會議的錄影,發現鬍鬚曾離場係早上九點開會後第五十一分的事。三歲細路都識得計,當時應該係朝早九點五十一分,而唔係九點四十分(順帶一提,當時田北俊正在發言,他見到鬍鬚曾離場仲發晦氣話:「財爺唔知係咪唔啱聽,仲走咗去添!」)。

第三點:據當時在場的議員透露,鬍鬚曾當時的反應,與其話係「驚喜」,不如話係「錯愕」。

第四點:鬍鬚曾話十五分鐘就call齊班同事集合,其實無需事前做定準備,事關政府總部就喺立法會大樓隔籬也,莫講話步行,即使係躝,十五分鐘點都到啦,嗄話?

第五點:所謂「預先準備好的講稿」,連標點符號、「大家好」、「多謝」等客氣說話,棺材山地元寶蠟燭連工包料都只係得354字咁大把,但係就要在十一點十分先至出到街,離鬍鬚曾自己宣布得悉的「驚喜」時間,足足有個半鐘頭,亦即係九十分鐘。有數得計,即係鬍鬚曾的寫作班子(應該是他的政治助理及新聞秘書)平均一分鐘只需寫四隻字(即係一個人寫兩隻字),毋須預先準備都有大把時間啦。更何況,估都估到,得三百幾字,齋係寫低個計劃名稱都佔了不少篇幅,留低的都只可能是原則性「肺」話吧。

各位,8仔之所以長篇大論,係因為鬍鬚曾以至整個政府都好離譜,完全當「規矩」係「老舉」,實在忍唔住話俾大家知,呢個政府幾低B!

 

若要滬港通 就要反佔中

benny tai apple daily

(圖片來源:蘋果日報)

有人話,阿爺推出滬港通,香港又會好似煲呔好多年前話事齋,想窮都幾難囉!呢一點8仔當然唔係好同意,事關呢一次係「北水南調」定係「南水北吸」,仲係未知數。

8仔只係知道,查實香港人一早就可以買到A股,將來只係再玩大好多倍咁啫,買得大固然有機會贏得大,但係亦都有機會輸得甘,甘過Forrest Gump,總之「羊犬」請小心!

不過,更加需要小心的是,強國人落嚟香港炒H股,風林火山風頭火勢咁將H股股價炒到有咁高得咁高,高過天比高,然後就take the money and run,「骨」水走人,留低「羊太」晚晚對住啲「股票牆紙」數綿羊。

當然,8仔估計,短期內應該唔成問題,因為阿爺好想營造「若要滬港通,就要反佔中」的「社會共識」(呢番說話亦都可以倒轉嚟講,話阿爺好想營造佔中阻住香港人發達的群眾心理)。

不過,8仔就認為,戴耀廷只係嗌幾聲「讓愛與和平佔領中環」,就換到五千五百億滬港通,不單止證明呢句口號真係嗌得過,更加證明佔中對香港經濟的貢獻其實可以好大,玩下手再嗌多幾聲,就有五萬五千億呢,嗄話?

 

 毓民賀余若薇選特首

wong to audrey 2

上個禮拜五晚係公民袋八周年黨慶,曾經同公民袋一齊搞過五區公投的黃毓民人唔到禮到,送了個靚靚花籃去會場,上面仲寫住「祝賀:公民黨黨慶  余若薇選特首」,搞到余大狀變了「八大山人」,哭笑不得。

話時話,余若薇當日著了條「土豪金」短裙,又幾有「愛國愛港」feel,如果她以呢個形象選特首,話唔定真係會過到阿爺嗰關呢,哈哈!

audrey eu 3

 

 

請支持我們持續發展,透過PayPal或其他方法贊助我們!
金額:
分類:|發表於2014年4月14日 上午11:36

發表評論

讀取中…
即時關注│馬惜珍申請撤銷逮捕令遭高院拒絕