游清源網誌│法治和自由在中國失敗的三大因素

8仔日記│田少踢爆政改底牌 泛民六子似拒還迎

2014-4-15 07:30
字體: A A A

(原圖取自:蘋果日報)

2014年4月15日 星期二 政改盤口:一賠十

去上海灘打完一個白鴿轉之後,香港白鴿黨真係越來越似上海拆白黨,都係「吃白食、看白戲、睡白覺」的騙子。此話何解?且看「一嚿雲」黃碧雲的總結。

一嚿雲總結上海之行時形容「冇好消息,但係亦都冇更壞消息」。

救命!敢問一聲:咁你去上海做乜呢?點解唔返屋企瞓呢?點解唔留喺香港睇香港電影金像獎呢?

查實,視力稍為正常的人都可以睇到,「煙剷主任」王缸瓦單手fing本《基本法》俾泛民議員,即係叫你班蛋散唔該睇清楚阿爺的要求。佢表面上話你哋唔熟書,實際上係話你哋唔熟性。至於佢講普選「四個一」,即係「各位觀眾四條煙」,原來仲差一條煙,而且係最重要嗰一條煙,就係「共產黨第一」嘞。睇落,王缸瓦真係有啲似大叫「各位觀眾──五條煙」的周星馳!

另外,「西環大少」張小明話未來兩個月好願意同冇嚟上海的泛民議員單獨會面,食飯又得,飲茶都得,得咗!呢番說話查實另有玄機,意思係中央將會直接向泛民議員箍票,眼尾都唔使睇下林鄭嗰個乜嘢政改三人組。由此亦可見,林鄭已經失咗分。

關於向泛民議員箍票,都係田大少夠坦白,佢話富貴黨提出的政改方案令政府有空間,目標係拉到泛民5票俾方案通過。

事實上,呢次上海行,對阿爺來講,最大作用係「引蛇出洞」,睇下邊啲泛民議員較為願意「合作」。結果,靈過車公靈籤,一試就試到湯渣華、莫奶媽、李角麟、馮檢點,以至梁鬼槍(佢借咗長毛件六四T恤,但係等到啲人走晒先至著上身,然後po上fb呃like),都較為識do。屈指一算,已經有6票,即係唔使白鴿黨都夠玩。

開盤:阿爺的政改方案過硬,一賠十!有殺冇賠!

 

創新及科技局搵乜水做?

SciencePark_Auditorium(圖片來源:維基百科、Chong Fat)

梁至英重推「創新及科技局」,一睇就知起碼有兩大問題。

第一個係當正呢個局係爆石爆出嚟,查實之前就已經有「工商及科技局」,再之前仲有「資訊科技及廣播局」,即係話政府一直都有相關政策範疇做緊,只係後嚟融入「商務及經濟發展局」,先至隱藏咗,但係相關的政府部門依然存在,而且日日做緊嘢。而家另立新局,只得一個合理解釋,就係梁至英又想安插自己友入嚟。但係咁做,只會令到製造冗員的「帕金遜定律」(Parkinson’s Law)再次發功咁啫。

第二個就係人選問題。梁至英揀卒能力十分嚇人,無論係陳茂波抑或邵善波,無論係吳克儉抑或黃錦星,都只能令市民懷疑,呢個創新及科技局局長究竟有幾得人驚。所以,政府一日提供唔到局長人選名字,開設呢個新局,學好打得話事齋,真係「諗都唔好諗」!

 

 《主場新聞》受難日「斷水」

tony choi

(圖片來源:主場新聞)

8仔一直以為,《主場新聞》主要收入來源(即係《蘋果日報》〈金融中心〉專版稿費)將會喺今個月尾先至會「斷水」,殊不知原來「復活無期」,即係今個星期四(4月17日)就會「截水」,比預期仲要早半個月,認真慘情。

希望《主場》主要投資者蔡東豪兄「節哀順變」,發揮小宇宙,開拓「新水源」,而《主場》諸君亦都可以做到「艱險我奮進,困乏我多情」啦!

 

 美軍絕密行動致馬航離奇失縱?

mh370a

關於馬航MH370離奇失縱事件,一直都有好多唔同的解釋,其中更曾經出現過十大陰謀論。不過,8仔日前就睇咗另一個陰謀論,講得最似層層,最似荷里活鉅獻,最似真係可能發生的情況。

是咁的:

話說美國佬撒出阿富汗,但其中一架空軍運輸機就俾塔利班騎劫咗,機艙內有一組無人駕駛轟炸機的控制系統,重達20噸,載喺六個木箱裡面。塔利班不但據為己有,仲順手殺埋兩個美軍海豹突擊隊員。當時大約係2014年2月。

塔利班要三樣嘢:第一樣係錢,第二樣係錢,第三樣都係錢!

佢哋打算賣俾俄羅斯或者中國。但係俄國佬忙於搞烏克蘭,而中國佬就好渴望擁有呢個系統的超高科技。

大家不妨發揮一下想像力,假如中國擁有呢個系統,所有美國無人駕駛轟炸機都會變成紙飛機。所以,中國就派出八個最top的軍事科學家去檢測呢個系統,然後答應付出數以百萬計的美元。

2014年3月初,呢八個科學家就帶住嗰六箱設備去馬來西亞,因為佢哋認為,喺大馬搭民航機去北京,最可以避過偵查,而美國佬亦都唔敢輕舉妄動。再加上由吉隆坡飛去北京只係需要四個半鐘,可以快刀斬亂麻,快手快腳就搞掂。

結果,中國選定咗馬航MH370!

殊不知,美國佬誓要奪回系統。佢哋同以色列特工聯手,一行五人上咗MH370。當航機離開大馬領空,準備向越南航空控制中心報告時,美國佬就用AWAC(空中預警及控制系統)干擾航機訊號,同時啟動遙控系統,變相控制咗整架航機的飛行路線。

嗰五個特工隨即接管航機,熄晒機上面的雷達收發器及其他通訊系統,改變航道,一路向西。佢哋之所以唔向東飛去菲律賓或者關島,因為整個南中國海的空域都有中國的偵測雷達和衛星。

航機飛越北蘇門答臘、阿南巴斯群島、南印度,然後喺馬爾代夫著陸,加油後再飛去印度洋中心的迪亞哥加西亞島(Diego Garcia),嗰度係美國空軍基地。

就喺嗰度,佢哋將六箱設備同埋個黑盒拎走。至於乘客,特工就用「最自然」的方法令佢哋靜落嚟。

嗰個方法就係──缺氧。

特工深信,只有死人先至唔會講嘢。

之後,美國佬就用遙控方法,令MH370再次起飛,而裡面載住的,都係死屍。最後,一架冇咗黑盒的MH370就撞落南印度洋,令世人相信航機係因為燃油耗盡而墮海的,同時怪責機師及面機師罔顧他人生死。

呢個故事真係信不信由你,但係,如果MH370真係載住美國無人駕駛轟炸機的絕密高科技,恐怕大家都唔敢完全排除美國佬真係做得出啩?

請支持我們持續發展,透過PayPal或其他方法贊助我們!
金額:
分類:|發表於2014年4月15日 上午7:30

發表評論

讀取中…
陳頌紅網誌│你XX的別說髒話,行嗎?