游清源網誌│泛民上海行兩大奇葩

8仔日記│夢熊拍住陶傑做亞視 《Dream Bear天下》5月殺破狼

2014-4-16 07:30
字體: A A A

(原相取自網絡圖片)

2014年4月16日 星期三  大師有夢贏官司 大班有份救亞視

8仔八到,官司纏身的劉夢熊盡地一煲,夥拍「香江第一才子」陶傑一齊主持亞視時事評論節目,名稱叫《Dream Bear天下》,如無意外,5月5日星期一夜晚九點半就會出街,每集半粒鐘咁大把。

早排亞視「不倒翁」執董葉家寶喺發布會透露,「主打」的時政節目將會調到晚上9時30分播出,仲話相信節目播出時會「好震撼」。而家睇番,原來「好震撼」的真正意思,就係搵到夢熊大師指點江山。

呢趟夢熊大師同亞視可謂各取所需。亞視為咗續牌,終於肯做番些少嘢,畢竟續一次牌就有十二年,揼些少錢真係制得過。更何況,通訊局好多委員都好唔想續個牌俾亞視,亞視唔做番啲嘢,通訊局主席何沛謙真係好難向公眾交代,一個唔覺意甚至會一世英明一朝喪添。

Dream Bear方面,真係盡地一煲,事關如果佢老哥唔可以喺官司前做唔到意見領袖,發揮唔到小宇宙,向某方面講數的籌碼就等於「劉皇馬」。而家瞓身做時事評論節目,雖然到頭來未必止到咳,但係以Dream Bear「一條泳褲闖香江」的豪情,有得搏總好過洗定個大象pet pet等踎監。

至於陶傑,查實早已喺商台節目《光明頂》同Dream Bear合作過,效果好過好多香港經典廣告。如今再續前緣,合演「政治版《殺破狼》」,殺狼英一個措手不及,話唔定會勁過宇宙最強甄子丹呢!

順帶一提,聽講亞視嚟緊仲有唔少大動作,其中一個係同「大班」鄭經翰有關嘅。等8仔再打聽清楚,就會第一時間話俾各位街坊父老叔伯兄弟姨媽姑姐知架嘞。

 

神級才子名遂  《蘋果》社長「裸退」

tung kiu

(圖片來源:台灣成功大學網頁 )

講開才子,香港殿堂級才子董橋將會正式告別《蘋果日報》,而且係「裸退」。

事實上,七年前,聞說當時65歲的董橋已經好想退休,經幾番周折,年前只能半退休,每個禮拜返三日工,但依然心繫《蘋果》,不時遙控,令唔少員工為之動容。

日前,肥老黎同董才子食飯,席間再次傾到退休問題。呢一次,董橋終於全身而退,真人表演「功成、名遂、身退」呢個「天之道」。

聽講,董老將會做到4月尾,各位「蘋果仔」、「明報人」記得輪定籌同佢薦行喇。

又係順帶一提,當年係前廣播處長「張大姐」張敏儀推薦董橋俾肥佬黎做《蘋果》社長嘅呢!

 

「中共舊燈芯」劉兆佳  「愛國新發財」劉慧卿

lau siu kai hkej

(圖片來源:信報)

以前有「港英舊電池」,家下有「中共舊燈芯」,而其中一條就係身兼全國政協委員的全國港澳研究會副會長劉兆佳。

佳叔離開中央政策組之後,靜咗一陣,出番嚟之後,竟然比以前風騷咗好多,可謂勁過渾身是勁的勁量環保電池。

佳叔昨日話,2017年實行行政長官普選困難重重,預測會出現兩種情況,一種係普選方案不獲通過、政制發展原地踏步,另一種係通過一個對保守及溫和人士參選有利的選舉辦法。佢認為,兩種情況都會帶嚟政治不穩,預期政制發展原地踏步的可能性不低,短期動盪不可避免,甚至會進一步惡化,各方必須警惕,云云。

佳叔查實係倒轉講,因為唔少泛民都「情願原地踏步,不要行差踏錯」,所以原地踏步的震盪肯定會細好多。實情反而係「通過一個對保守及溫和人士參選有利的選舉辦法」的「可能性不低」,而且中央已經預咗「短期動盪不可避免,甚至會進一步惡化」。原因好簡單,因為阿爺要從泛民裡面攞到5票,可謂十拿九穩(有估計現階段數票已經唔止5張,直頭有突)。但係,正正因為係假普選,佔中睇怕就好難避免。

正所謂「若要計劃經濟做得好,就要計劃政治做得到」。由此路進,阿爺自然會盡力將參加佔中的人數減到最少,然後就會請呢班唔識趣嘅友仔食「兜槌窩面」。咁樣,先至解釋到,點解佳叔會咁講,而最佳佐證就係佢跟手又話,對政制發展的中、長期前景唔悲觀,相信政制爭論、政制改革及民主化進程唔會永久停頓。

講開政改,關於泛民上海行,仲有一點可以補充,就係泛民議員送禮物俾王光亞,白鴿黨單雞、一嚿雲又好,民怯基公又好,公民袋覺榮幸都好,一個二個都只係識得笑口噬噬對住煙剷王,即使俾煙剷王撚化都唔識得還拖,真係失禮街坊。

查實,要搞到王光亞好容易,只需問佢一個問題就得。

呢個問題就係:「你覺得劉慧卿愛不愛國、愛不愛港呢?」

如果佢答「愛」,就反問佢:「那麼,為什麼不發回鄉證給她呢?」

如果佢答「唔愛」,就反問佢:「那麼,為什麼會邀請她來內地呢?」

搞掂!收工!

 

高鐵Project變「仆直」  張炳無良更無心

cheung bing leung apple daily

(圖片來源:蘋果日報)

一場所謂「二百年一遇」的黑雨,令高鐵Project變「仆直」,繼而引發骨牌效應,港鐵呢隻鑊肯定仲大過赤柱黃麻角嗰啲衛星接收器(有關問題,可以睇睇尋日同今朝本報的分析評論,不贅)。

關於「二百年一遇」,好多人一聽到,起初會失笑,然後就會大叫「打得少」!原因好簡單,因為二百年前的香港,根本冇可能有相關的統計數字也!不過,怪只怪港鐵的發言人講到烏利單刀,查實呢個唔係統計數字,而係或然率。

8仔試下用通識水平嚟解釋一下,所謂「二百年一遇」,意思係二百個雨季只有一個雨季先至有機會出現的一次黑雨。再簡單啲講,就係好似掟二百次飛鏢,只有一次機會先可以掟到的位置。明未?唔明?好對唔住,8仔都幫你唔到!

呢次高鐵「仆直」,仲有一點可以講的,就是運輸及房屋局局長張炳良。

必須指出,張炳良原本諗住只係做房屋局局長,但係由於「五司十四局」嗰個建議俾長毛佢哋拉布拉到冇得通過,佢就惟有做埋運輸嗰瓣,但係就搵咗邱誠武返嚟做番副局長,專責搞運輸。殊不知,邱副局長本身做運輸都做到好多是非,2008年8月15日剛剛做運房局副局長冇耐,就搞出個「機場的士風波」,個八月十五花過菊花,能力惹人疑問。總之,家下負責運輸的問責官員,局長無心,副局無力,唔出事就有鬼。

經此一役,張炳良睇怕都會俾人改番個日本名,叫「張炳無良」囉,呵呵!

請支持我們持續發展,透過PayPal或其他方法贊助我們!
金額:
分類:|發表於2014年4月16日 上午7:30

發表評論

讀取中…
鑽挖機忽然四變七 「樊梨花」不敵黑雨死