6工廈6周內需改違契用途 陳茂波:與活化工廈政策無矛盾

銀水 -的士大哥

-的士大哥

細個志願做機師,成日發夢發達之後唔使做,點知最後做咗個日踩十二粒鐘嘅的士司機。最鍾意就係吹水唔抹嘴,日日揸的士咁多「奇遇」,不如就喺度同大家分享揸的士嘅所見所聞。

轉左轉右仲要停車添,究竟你想去邊呀?│銀水│的士大哥

2016-7-16 12:30
字體: A A A

最近天氣真係好唔穩定,間唔中都落雨。有一日下晝,我同班行家飲茶傾偈休息吓,發現大家都有好相似嘅經歷……

阿華係嗰日同我一齊飲茶嘅其中一位行家,佢話前幾日落完大雨,停咗雨冇幾耐,有個客喺沙田call車,話要去機場。去到沙田同個客會合,明明對方已經見到佢架的士,但仲堅持一定要阿華將架車駛到去佢面前,自己行幾步路都唔肯!一聽到呢度,幾位行家都「心知不妙」──睇嚟呢個都係麻煩客。

個客上車後,阿華經尖山隧道去機場,諗住多數機場客都係趕時間㗎啦,所以就開快咗少少,不過個客要求揸慢啲:「唔好揸咁快得唔得呀?」

阿華其實都有少少唔like㗎啦,覺得佢要求多多,但唯有聽佢講,開慢少少啦。而個客就一路好似「鬼食泥」咁,同阿華「解釋」點解叫佢揸慢啲,個客話因為自己撞過車,所以好驚架車開得太快。但話口未完,架車去到青馬橋嗰陣,個客又話要快啲啦喎……

「可唔可以開快啲呀?我趕時間呀……」

阿華都頂佢唔順,心諗,「究竟你想快定慢呀?揸得快又話快,揸得慢又話慢,又話趕時間。搭飛機又唔見你驚?」

「快少少啦,但又唔可以咁快呀,太快我會好驚……」

阿華都冇佢符,唯有用返正常速度揸,車到佢去機場,阿華仲話「終於甩難」。

講起呢啲雨天嘅「奇遇」,我近排都有個差唔多嘅經歷。

前幾日,我喺太子一間醫院門口車個大肚婆去佐敦,諗住有大肚婆喺車,而且又天雨路滑呢,都係揸慢啲小心啲好!不過個大肚婆好似仲大膽過我,上車冇幾耐就開始話我揸得慢,仲不斷叫我轉左又轉右。

之不過,明明面前就只得一段直路,邊有路口可以轉呀?問多次佢係咪去佐敦,確定咗就繼續直行。行咗冇幾耐,同佐敦仲有一段距離時,佢又忽然之間大叫:

「停車啊!」
「咦?你唔係話去佐敦咩?呢度未到呀!」
「係呀,我係去佐敦呀。」
「但係呢度唔係佐敦呀,都未到,點解你叫停車?」
「哦,冇呀。我係要停車又去佐敦呀。」

我完全聽唔明佢講咩,已經唔想再反駁佢,總之最後車到佢去目的就算……

其實要求我哋揸快啲定慢啲都冇問題,不過大家搞清楚想點先啦,一時要求快,一時要求慢,仲忽然之間叫我哋停車,我哋都好難做㗎。

(圖片來源:Google Maps截圖)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年7月16日 下午12:30

發表評論

讀取中…
方保僑:尼日利亞令我條道德底線守得更穩│方浩文