游清源網誌│沉默會令未來更腐壞

8仔日記│白宮之行急轉彎 陳太方案被投籃

2014-4-17 07:30
字體: A A A

(原圖取自香港2020)

2014年4月17日 星期四  陳太太無知還是太小資?

雖然好老土,但係好有譜,所以都要講:「政治,真係一日都嫌長!」

呢句說話,陳方安生應該好有體會。

3月20日星期四,「香港2020」發表「陳太方案」,提出特首提名委員會維持四大界別,第一至第三界別各維持300人,並以個人票取代公司票及團體票;而第四界別(即政治界別)則由300人增加至500人,並取消過往由317個現任18區區議員各自互選的做法,改由全港選民一人一票直選317個提委,而這個亦都是這個方案的最大賣點。

事隔兩日(即是3月22日星期六),在林鄭月娥大叫「一錘定音」的那個政改研討會上,「北京護法」饒戈平在茶聚時表示,「公民提名」可以不提,「陳太方案」可以提。此話一出,就被視為北京願意向陳太釋出善意的訊息。

原因很簡單,因為陳太不惜以不提「公民提名」來令北京覺得有得傾。事實上,8仔收到風,其後有中間人表示,日內將會拎「陳太方案」去中南海,還信心爆棚的說「靜候佳音」。

殊不知,4月5日星期六,陳太和李柱銘見完美國副總統拜登之後,情況就逆轉,等到泛民去完上海做完場大龍鳳之後,左報再無顧忌,即刻開火(聽講還陸續有來)。

至於「陳太方案」,中間人就嘆氣話:「已經俾阿爺掉咗落字紙籮!」

陳太的問題,如果套用中共的講法,就在於存在「小資產階級的兩面性」,即是一時一樣,一時可以十分之革命,一時又可以十分之反革命,若要改正,就要接受無產階級領導,就要接受社會主義改造,云云,問你服未?

查實使乜講得咁鬼複雜呢?陳太的問題,一句到尾,就係唔係太過識得玩「挾外自重」、「挾精英自重」、「挾民意自重」。呢方面,佢真係好應該花啲時間向老毛學習學習。毛澤東識得借蘇聯企穩,借知識分子搞好形象,以至借農民打江山,明未?

 

張曉明犯天條

cheung hill ming calligraphy

(圖片來源:蘋果日報圖片)

中聯辦主任張曉明平時規行矩步,勢估唔到在掌聲燈影裡就自我膨脹,竟然學國家領導人題字,仲俾民建聯拎去籌款,結果一籌就籌到1380萬,比國學大師饒宗頤的墨寶仲要貴七倍,令唔少無知者覺得,佢唔做西環一哥,賣字畫可能仲發(實情自然係人走茶涼,佢唔做西環一哥,睇怕連喺街邊寫揮春,收人十元八塊都未必有人幫襯)。

查實,高價買入高幹字畫,係變相賄賂或者變相交保護費,情形就好似某某麻雀館掛咗張老闆同警隊高層的合照出嚟一樣,張曉明咁聰明,應該冇理由唔知。更何況,習近平入主中南海之後就推出「習八條」,其中一條明明講明除非中央統一安排,否則各級幹部不宜題字題詞。張曉明家下咁做,唔通博「雙規」?

 

郝鐵川傳雙規

kwok tit cheun apple daily

(圖片來源:蘋果日報)

講開「雙規」(即是「要求有關人員在規定的時間、地點就案件所涉及的問題作出說明」),聽講中聯辦前宣傳文體部部長郝鐵川就受緊。

見親記者都會自稱「郝部長」的郝鐵川本來諗住接李剛做中聯辦副主任,但一來盛傳張曉明不喜歡他,二來其「食相」亦都令不少人「嘆為觀止」,所以根本係一廂情願。

至於「雙規」導火線,江湖傳聞係同一份新報紙有關。話說某飯局,新報紙的搞手請了不少有錢佬嚟,而郝部長就在席間大發偉論,令人以為那份新報紙已經得到西環祝福,多多少少都表示願意落廣告,支持支持。

殊不知,其後一個場合,其中一個有錢佬撞到小明,就表態話一定會支持該份新報紙,但小明就即場話冇啲咁嘅事。

冇幾耐,郝部長就「被消失」。

有人話郝部長被調返內地,但係亦都有人話冇人肯收留佢,甚至有人話佢已經被雙規。

一句到尾:中共官場從來都係咁刀光劍影、死十個當五傷也!

 

馬尼拉市長原是影帝  下周二來港感動師奶

Joseph Estrada 2

(圖片來源:網絡圖片)

馬尼拉市長埃斯特拉達下周二就會來港道歉,不過就只係代表馬尼拉市民,而唔係代表菲律賓政府,呢一點好多香港人都睇得穿。不過,大家可能會估唔到的是,埃斯特拉達的演技勁好,聽講拍得住發哥、偉仔。

達哥廿四歲已經做咗菲律賓影帝,至叻扮羅賓漢之類的劫富濟貧英雄,主演超過一百部電影,仲犀利過關德興扮黃飛鴻。

由呢位菲律賓影帝來港獻技,話唔定真係可以感動到睇慣無記電視劇的屋邨師奶,以至一個唔覺意就接受佢道歉。

講開道歉,香港人一直都係想菲律賓總統阿基諾三世正式代表發出,但係佢就擺到明唔會咁做,仲扮晒唔知香港特首係乜水(香港特首個名聽講叫「悉尼老鼠」)。

昨晚,人民力量「大嚿」陳偉業就喺nowTV時事評論節目《大鳴大放》度講,最有效的方法查實係搵出阿基諾家族做乜嘢生意,然後就喺嗰度埋手,等佢知痛,先至有可能迫到佢道歉。

大嚿咁講,就令8仔諗番起,舊年11月6日,《信報》紀曉風(即係家下《852郵報》的核心成員)曾經寫過一篇報道,話阿基諾三世家族顯赫,生意涉足食品、地產、農業等多個範疇,其中生力集團(San Miguel Corporation)更加係菲律賓最大食品和飲品生產商,1914年開始出口啤酒到香港,旗下的香港生力啤酒廠有限公司係港交所上市公司,響元朗設有啤酒廠。

當時的紀曉風(而家的紀曉風是A貨)仲搵咗城市大學應用社會科學系助理教授黃伯農獻計,話可以研究在不違反自由市場等原則下,針對生力採取制裁措施,雖然未必立即取消酒牌,但可以考慮收取針對性費用,間接施壓。

黃教授仲話,菲律賓政客對敵對陣營時不時都會使出類似招數,例如巴士公司在選舉期間不支持總統連任,當局可以「秋後算賬」,日日以檢查消防安全做藉口,作出政治騷擾。他承認,阿基諾三世家族肥到著唔到襪,就算直接向生力開刀,影響都未必好大,但係至少都可以令佢覺得痛也。

請支持我們持續發展,透過PayPal或其他方法贊助我們!
金額:
分類:|發表於2014年4月17日 上午7:30

發表評論

讀取中…
基金撥款或多餘 審批公布日距活動日最短僅8天