【里約奧運】里奧開幕主題節約環保 長跑名將利馬燃點火炬

銀水 -的士大哥

-的士大哥

細個志願做機師,成日發夢發達之後唔使做,點知最後做咗個日踩十二粒鐘嘅的士司機。最鍾意就係吹水唔抹嘴,日日揸的士咁多「奇遇」,不如就喺度同大家分享揸的士嘅所見所聞。

睇路呀……周街捉精靈!│銀水│的士大哥

2016-8-6 12:30
字體: A A A

呢排最多人討論嘅話題,其中一個當然非Pokémon GO莫屬啦!不過我呢啲有返咁上下年紀嘅,就真係覺得冇咩好玩,加上成日揸車,邊方便玩呢?有時見到好多客一上車都會即刻拎手機出嚟玩(好彩冇叫我專登揸慢啲架車方便佢哋捉精靈),佢哋仲會羨慕我跨區周圍去,以為我會捉到好多……連我冇玩都感覺到有幾受歡迎!不過呢個遊戲帶畀司機幾多麻煩,就真係我哋先知……

每朝7至9點,都係打工仔返工遲到嘅高峰時間,前幾日我就睇啱呢個時段,專登去的士站等客,起碼唔使將架車周圍駛來駛去嘛!離遠見到個的士站都唔係好多的士排緊隊,梗係要嗱嗱聲埋去霸返個靚位。

不過,喺我已經駛到好近,準備停車嗰時,突然之間有個後生仔走出嚟,穿過我同前面架的士之間嘅「空隙」,一邊行,一邊玩手機!因為見佢行得好慢,我又駛緊埋去,好危險㗎嘛,迫住我專登出聲叫佢行快啲:

「喂!行快啲啦!」

但係佢依然好專心咁望住手上面嘅電話,我諗佢都未必聽到我叫緊佢添。我叫完佢之後,佢唔單止冇行快啲,仲直情停埋喺前面架的士嘅車尾。再望一望佢玩手機嘅動作,肯定佢係玩緊Pokémon GO,捉緊精靈!

咁當然,我一早已經見到佢,停得切車,梗係冇事啦。佢捉完精靈見到我架車已經駛到咁近,仲反而嚇親,即刻走開添。雖然我都知道好多人覺得個遊戲好好玩,但都唔好喺路邊捉精靈啦!行埋一邊先捉……好嗎?

(圖片來源:Google Maps截圖、網上圖片)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年8月6日 下午12:30

發表評論

讀取中…
鄭家富與范國威之間的「數學題」,註定不可能「1+1大於2」?│丘偉華網誌