【里約奧運】同為中國運動史上第一人 孫楊步劉翔後塵贏代言輸成績?│皇甫清

擇宅藍

-地產講呢D

香港大地產代理公司小經紀,路見不平,借網發聲!

價值400萬的一件雞│擇宅藍網誌

2016-8-8 20:38
字體: A A A

「黃太,我,同阿敏,都喺,埋一齊,咁多年囉。所以我,尋日,買左,樓,諗住,同,阿敏結,咗婚,之後一齊,住。」講呢句說話嘅,係响某中學教數學嘅權仔,平日講數一輪咀唔停,只係望住黃太銳利嘅目光,同埋枱面碟雞,忍唔住狂用鄺體。

權仔住公屋,自從同住喺隔離邨嘅阿敏拍拖,「有樓先好諗結婚!」一直係未來外母,應該係「黃太」嫁女清單上一個基本要求。

「做咩咁見外叫黃太,大家都就嚟一家人啦,叫媽咪啦,唔係叫Auntie都可以架!」黃太收起激光中的眼神,突然變成慈祥的媽媽,笑容滿面,開心過中六合彩。

黃太這個笑容,價值400萬。

2014年4月,權仔每個月死慳死抵,計嚟計去,終於儲夠45萬,準備用30萬俾首期,同阿敏結婚,可惜樓價升不停,想多幾天,樓價又升20萬。

2年過去,樓價由2015年年底下滑。市場愁雲慘霧,權仔心諗,係時候入市,積極睇樓,刨地產報導,約經紀取經,終於到今年4月,睇啱咗一個叫價320萬嘅單位。

叫價輕微超過權仔的預算,權仔左想右想,幾經掙扎,決定還價310萬。就在那天晚上,單位315萬售出,可是,「新娘出嫁了,新郎不是我。」

權仔原本以為,這個買家較惡的世代,可以維持多幾個月,「筍盤周街有啦!」可惜,世界變化得真快,2個月的時間,不少上車客見樓價又再上升,整個樓市又回到去年搶盤時。

就似在摩士公園捉啟動暴龍,一有放盤買家們便爭先睇樓,同一時間有幾組睇樓客睇樓的情況,權仔近2個月都遇過5次;新盤示範單位更誇張,為咗睇一個睇樓書都嫌細嘅單位,要瀕臨中暑地排隊。

權仔急了,擔心樓價再升,結婚之期越來越遠。結果,在8號風球的晚上,權仔去睇樓,現場變成道場,他和另一個買家同時睇中單位,結果權仔用誠意……金,一張15萬元的支票,打動業主,以400萬打敗出價390萬的對手,購入單位,那一刻的勝利感覺,比捉到啟暴龍更興奮。這刻興奮,維持了10秒。

「食件雞啦!今日隻雞好鮮甜架!順便傾埋禮金啦!」黃太5年來首次夾餸俾權仔,將權仔由回憶拉回現實。他用0.3秒儲氣堆起笑面,咬下雞肉,回想起未來25年的供樓旅程,只覺得這件雞,比苦瓜還要甘。

(原圖為蘋果日報圖片)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年8月8日 下午8:38

發表評論

讀取中…
【DBC交牌】DBC創辦人鄭經翰聞訊 「我唏噓大於開心」