Angelina網誌│Airline是一座圍城，城裡的人想逃出去，城外的人卻拚命衝進去

「Airline是一座圍城，城裡的人想逃出去，城外的人卻拚命衝進去。」──Angelina，2014

唔好意思，今日講的話題比較嚴肅，因為這陣子，我也在煩惱這個問題。

「你就好啦做空姐！成日周圍去！」「哇！我夢想係做空姐㗎！考好多次都唔得呀！」以上對白，相信每個空姐都聽過無數次。

的確，不少女仔都有「空姐情意結」，甚至有好多你估都估唔到佢會有興趣做空姐的人，會突然同你講：「其實我之前都考過。」可能係自細夢想／畢業後唔知做咩好咪試下囉／想用平機票玩下先／覺得做空姐都幾威／（老土地）陪Friend一齊考，點知得咗喎，oh my god……

每年打開報紙，都會見到幾百人排隊爭幾十個名額，有很多人甚至係第十次來考的，唔講仲以為做空姐可以致富。

而我，每日打開Facebook和上班，就會見到／聽到同事訴說工作的辛酸／想resign／已resign，搞到我都好想resign。我知我知，份份工都有辛苦的地方，我哋所擁有的，已經是很多人夢寐以求卻求之不得。但，不在其位，你永遠唔會知道你對空姐的誤解有幾深。

誤解1：高薪厚職

經常被乘客問我人工有無四4、5萬，我諗你係將空姐和機師mix up了（當然機師會更高）。正常來說，一入職時的薪津（底薪加其他津貼），大約是16k至22k左右（視乎該月份的工作量及工作地點）。是的，對Fresh grad來說這是不錯的價錢。

然而，上升幅度卻是接近零。以敝公司為例，經過工會和公司一再相討，我們今年加薪約200元，嗯，也不差，最近發現原來跟TVB的加幅差不多。

當然，年輕人要捱的，捱5至6年升職後，加薪是，大概2、3千。再做多10年，再加薪，又是2、3千，而你已經差不多升到盡頭了。相信這升幅並不是一般人對高薪厚職的定義吧。

誤解2：多假周圍玩

可能你成日見空姐朋友個個月去旅行，好多假期好爽皮，但其實，我同你的假期係一樣，甚至更少。以我為例，一年有24日大假，好似好多，但，不要忘記，這24日已包括12日法定假日，即是實際大假只有12日。

這些大假還是要提早一年選好，想去旅行？節日唔好諗，機都上唔到。想同家人做節？睇你抽唔抽到好簽，可以第一批選。多假的假象，只是因為我們可以把一般人的例假放在一起，再加上前一日早放工，於是營造個個月有三四日「大假」的感覺。

至於工作的辛酸，之後我再慢慢告訴各位。看到這裏，想問一句，大家現在還覺得，空姐是人工高、福利好的Dream job嗎？

至於我，就是那種想逃，但無勇氣逃出去的人，只好繼續在這圍城裏笑著打怪獸。

（wallisty.com圖片）