游清源網誌│香港人呀,你可以像他嗎?

8仔日記∣新一代點解咁嬲689?

2014-4-28 07:30
字體: A A A

(原圖取自:爽報)

2014年4月28日 星期一 當靜宜遇上大雄

古語有云「一日之計在於晨,一周之計在於Mon」,Monday本來最好同大家講下大計,不過,左計右計橫計掂計都好難計,事關生活真閉翳,尤其係新一代,簡直係乜都冇得計。

8仔識得一個出來打了兩年工的九十後靜宜。佢學音樂,本來好嫻靜,但係過去幾個月就越來越好火,久不久就會爆粗,輕則頂阿689個肺,重則問候佢娘親。

你知我知,大部分女仔都好想擁有A Room of One’s Own,靜宜都無例外,佢一直都好想有自己一間房,但係佢住響公屋,雖然叫做有間房,但係要同細佬同房,更加難保私隱的是用個大櫃間開個房,亦都冇整房門,令佢覺得就算半夜起身寫低少少少女心事都會俾全屋企人(尤其係媽咪)知道,感覺就好似沖涼冇閂門,唔單止好瘀,而且好灰!

不過,靜宜之所以會性情大變,原因係佢一年前遇上一個男仔大雄,認為佢好有可能就係The One,所以好想搬出來住,等佢可以久不久上來,證實一下個feel係真唔係真。但係,一搵之下,發現到的,唔係筍盤,而係絕望!

 

除非唔著衫 否則租唔起

靜宜話,佢先搵到觀塘有個二百呎單位,月租五千幾蚊,勉強頂得住,但係冇升降機,而那個單位響十樓,晚晚放工返歸要爬十層樓都幾係,唔好講話夜晚心血來潮想落去七仔買條司華力腸食下。

另外一個單位響深水埗,都係二百呎,雖然冇升降機,但在三樓,頂得住,可惜頂唔住的是租金,要七千幾蚊,加埋燈油火蠟,一個月起碼要九千蚊至落到樓,而佢每個月就只得萬三蚊,搭車食飯起碼唔見四五千,除非唔買衫,甚至唔著衫,以至連一支Fancl Tense Up都唔飲,否則根本冇可能租得起。

靜宜的結案陳詞是,佢供唔起私樓,但係又冇資格買居屋;佢租唔起私樓,但係又冇資格申請公屋。而689盲搶地,竟然唔係搶俾佢地,唔嬲就假!

 

上一代好愁 新一代好仇

靜宜呢種情況,可以話係「後物質主義心態撞到物質主義生態」!

所謂的「物質主義生態」,就係條街越來越多名店,條路越來越多名車,娛樂版越來越多名人騷,港聞版越來越多名畫以天價拍賣,等等,整體感覺就係個社會好似越來越進步,查實只係所有東西都越來越貴(除了打工仔的人工)。

而所謂的「後物質主義心態」,就係認為個人自由、個人追求、個人私隱、個人權利(包括最基本的發聲權及最根本的話語權)比較重要。擁有這種心態的人大多是新一代,他們即使不算富有,但大多數早在童年時家庭已經脫貧,以至有較多較大的空間去培養個性,而靜宜就算得上係其中一個典型例子。

當後物質主義心態撞到物質主義生態,一方面係不屑甚至鄙視唯利是圖的人(主要指五、六十後),另一方面就係對於自己的理想(無論幾抽象)被無情的物質社會握殺感到憤怒。

結果,一場意識形態的衝突(「後物質主義」對「物質主義」),就演變成一場「代際戰爭」(generation war,即是新一代憎上一代,甚至連父母都憎埋一份),以至「貧富戰爭」(因收入兩極化而將大部分中產新一代擠壓落基層,變相強化基層的戰鬥力)。

這樣的社會,點會唔愁?

這樣的社群,點會唔仇?

這樣的新一代,又點會唔嬲?

而要嬲,當然首先係要嬲689!

請支持我們持續發展,透過PayPal或其他方法贊助我們!
金額:
分類:|發表於2014年4月28日 上午7:30

發表評論

讀取中…
陳頌紅網誌│你快樂,所以我不快樂