記長發街市最後一日 別矣,童年回憶|那幻想中的人|黃丹瑤

銀水 -的士大哥

-的士大哥

細個志願做機師,成日發夢發達之後唔使做,點知最後做咗個日踩十二粒鐘嘅的士司機。最鍾意就係吹水唔抹嘴,日日揸的士咁多「奇遇」,不如就喺度同大家分享揸的士嘅所見所聞。

喂!做乜拎走我個錢箱?|銀水|的士大哥

2016-10-1 10:15
字體: A A A

小朋友諗緊啲咩,大人真係好多時都唔會明,所以話做人父母都真係幾辛苦。就好似前幾日咁呀,有一對母子上咗我架車,但喺短短10幾分鐘嘅車程,個小朋友嘅舉動已經令我「嚇一跳」……

當日,有一對母子喺荃灣河背村上車,話要去大河道附近。個小朋友大約3歲左右啦,初初都好乖咁坐定定,但隔咗一陣,佢就突然企喺身,爬上前!好似想爬上前面個位咁!

「嘩!做乜咁百厭!」

因為實在太突然,所以我都未反應得切!當我發現嗰陣,已經聽到個阿媽大聲同個仔講:「嘩!做乜咁百厭!」,想伸手拉返個仔去後座。

不過呢個時候,個小朋友已經爬咗上前,隻手伸到我隔離位,將我擺喺嗰度嘅錢箱一手攞走,仲將佢拎返去後座!

我見到梗係嚇一跳啦,揸咁多年的士都未見過,佢阿媽當然都係嚇親啦!不過好彩佢反應夠快,即時制止佢。本身我都有一刻諗過,究竟佢哋搞乜呢,但見到佢哋即刻畀返個錢箱我,個阿媽又講晒sorry,又教返個仔唔應該咁做,應該都唔係有心啩……

其實有時小朋友又真係唔知道自己咁做係唔啱嘅。到落車嗰陣,個小朋友都有親口同我講對唔住,仲話以後唔會再咁做。見到佢咁乖,今次就原諒佢啦!其實個小朋友都幾得意㗎……

(圖片來源:Google Maps、網上圖片)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2016年10月1日 上午10:15

發表評論

讀取中…
雞同鴨講──美國總統選舉辯論充滿火藥味,點用英文形容?|A Chicken Talking To A Duck By Chatterbox