馬德會無懼大巴陣作客反「車」 歐聯決賽上演西班牙首都打吡

8仔日記│強國《西遊記》再掀中港矛盾 討好習近平無綫落錯鞋油

2014-5-1 07:30
字體: A A A

2014年5月1日 星期四  勞動節最好唔勞氣唔動氣

今日係勞動節,連放勞工假嘅打工仔都可以唞吓,8仔實在唔想再咁「合肥」(heavy),所以,各位,不如就講吓無綫八點半合家歡黃金時段播緊嗰套強國劇《西遊記》把啦,好嘛?

尋日生果報娛樂版頭條報道,話「無綫《西遊記》太膠 網民怒轟求腰斬」。生果報是咪公報私仇,木宰羊!但係8仔就覺得,即使套劇拍得唔錯,喺中港矛盾已經上升到《人民日報》為咗一篤屎都可以寫特別評論嘅情況底下,只要係強國出品,都會觸動到唔少香港人嘅神經。

至於無綫何解連三年前嘅強國倉底貨都拎出嚟獻世,而且仲係擺喺黃金時段播,就令8仔諗番起,兩年前習近平仲係國家副主席嘅時候,就曾經喺美國公開提到《西遊記》嘅主題曲《敢問路在何方》其中兩句歌詞,就係:「敢問路在何方?路在腳下!」

仲有,早排中聯辦主任張曉明亦都喺民建聯嘅籌款晚會上面唱過呢首歌,一唱就籌到一千一百萬。

於是,大家就好容易聯想到,無綫是咪狗上瓦坑有條路,想乘機討好而家已經貴為國家主席嘅習近平,同埋愈來愈似係香港市委書記嘅張曉明。

如果真係咁嘅話,無綫呢次就隨時落錯鞋油,事關呢套強國劇好有可能會成為中港矛盾嘅新戰場也!

 

套劇兩年前播應該會冇事

強國《西遊記》聲稱斥資一億人仔(百度百科仲話使咗一億三千二百萬人仔),以60集(最初66集)計,即係平均每集嘅製作費高達二百萬港元,又話請咗《魔戒》(百度話係《X-Men變種特攻》,查實兩者人才有重疊)製作班底幫手做特技,照計應該好有睇頭,點不知就俾人話好膠、好柒、好kind,以至真的假到不得了,搞到有人要求腰斬。

平心而論,套劇只係播咗三集,咁快就話要腰斬,好似武斷咗啲。但係,要求腰斬嘅聲音又真係好強烈,強烈到無綫嘅《東張西望》又要護航。而之所以會搞成咁,比較合理嘅解釋,睇怕都離唔開「中港矛盾」呢四個字。

8仔睇番啲報道,其中幾句係網民kenixtgn喺tvb.com討論區留低嘅。佢話:「本土沒人才嗎?TVB為甚麼要在黃金時段播出一套,無論在內地或HK都惡評如潮的大陸片《西遊記》,扼殺HK藝人演出的機會。」

呢位網民可以話點出咗一個基本問題,就係捍衛本土主義。

講開本土主義,必須指出,中港矛盾激化,以至情況急轉直下,真係呢兩年嘅事,亦即係689上台後嘅事。唔好講其他,講番大陸劇,兩年前喺無綫播出嘅《鐵齒銅牙紀曉嵐IV》,唔單止收視率平均有廿七點,亦都冇惹嚟好大反應。而家《西遊記》打晒鑼打晒鼓,第一集都只係得廿五點,第二集就即時插水,急跌四點,得番廿一點,而且媽聲四起,咁搞法,或者真係可以反映出,兩年人事幾傷心,中港矛盾好很甘!

另一方面,曾經扮過唐僧嘅江華更加指出到問題核心所在。佢話:「TVB有好多人才,冇乜理由需要買外購劇擺喺黃金時段播,可能佢哋有佢哋嘅理由,我哋冇辦法去識破。」

或者,可以話,江華無意中點中咗無綫個死穴,就係管理層想討好老共,尤其係其中兩位,一個係習近平,一個係張曉明。

 

 TVB趁勢表「心迹」

習近平鍾意睇荷里活電影同埋大陸電視劇,可以話係「公開的國家機密」。另外,8仔翻查資料,發現早喺1983年底,佢做河北省正定縣縣委書記嘅時候,就曾經以《西遊記》故事做藍本,搞咗個「西遊記宮」出嚟。至呢套電視劇,聽講佢都好鍾意,難怪佢喺2012年2月中,以國家副主席兼「儲君」身份訪美嘅時候,都會引用呢套電視劇嘅主題曲《敢問路在何方》其中兩句歌詞啦!

佢原本嗰番說話,是咁的:「中國有句流行歌的歌詞是這樣唱的,『敢問路在何方?路在腳下!』我相信,中美雙方完全有智慧、有能力、有辦法維護和發展好相互尊重、互利共贏的合作夥伴關係,為不同政治制度、歷史文化背景和經濟發展水準的國家建設積極合作關係樹立前無古人、但後啟來者的典範。」

當時,佢身邊仲有美國副總統拜登同埋當時嘅美國國務卿希拉莉,可謂俾足面佢,而佢呢兩句金句,亦都好快成為「神州熱話」。

早排,張曉明又將呢首主題曲炒番熱。事緣佢喺民建聯嘅籌款晚會上面高歌呢一曲,一唱就籌到一千一百萬元。查實,錢仲係其次,最重要嘅係響應習近平「敢於踏出新路」嘅最高指示。

同樣道理,無綫播出《西遊記》,「心迹」其實同張曉明都可以話係一樣,以至順便向「香港市委書記」張曉明致敬亦都無妨也。

至於點解唔喺兩年前就播,較為合理嘅解釋係習近平未坐正,而無綫大股東陳國強亦都未坐暖也。

當然,呢啲都係8仔趁勞工假,輕輕鬆鬆同大家分享吓嘅一啲基本分析,實情未必係咁,8仔亦都好希望唔係咁,否則無綫就隨時落錯鞋油。事關照走勢,呢套強國劇好有可能會成為唔少香港人嘅主攻對象。

講到尾,喺黃金時段播強國劇,真係好容易令好多香港人諗番起,強國人喺黃金地段「留金」嘅呢!

TVB,祝君好運!

請支持我們持續發展,透過PayPal或其他方法贊助我們!
金額:
分類:|發表於2014年5月1日 上午7:30

發表評論

讀取中…
余婆婆駡出第一代香港人「特質」 李梓敬失言反照香港長者悲歌