史物夫網誌│國富論│強迫金對沖機制迷思

8仔日記│張炳良等候阿爺發落

2014-5-6 07:30
字體: A A A

2014年5月6日 星期二  689冇幫口

高鐵醜聞繼續發酵,兩個星期後(5月19日)立法會會再開會,喺呢段時間之間,張炳良係咪會辭職,備受注目,尤其係佢話「政治人生有時候要面對一啲抉擇,我不斷反應(反思)當中」,而梁振英亦都只係話「佢已經作咗鄭重嘅道歉,張炳良局長就呢件事十分認真去處理,做好佢作為局長嘅角色」,等於冇幫到口(事實係冇人幫張炳良,踩多兩腳就有份),令人思疑當中可能存在變數,即係話唔排除張炳良真係會辭職。

當然,張炳良落唔落台,決定權唔喺梁振英手上,而係由阿爺一錘定音。由於高鐵乃係「最高指示」,有乜差池都會人頭落地,所以張炳良肯定要等候阿爺發落。

本來,張炳良搞出個大頭佛,即使喺阿爺眼中,都係要人頭落地嘅,但係由於風頭火勢,辭唔辭職要睇政治效應。

 

辭職引發「火燒連環船」

首先講辭職。

張炳良辭職嘅政治效應暫時好難評估,一係可以做到「人亡政息」,順利平息呢場風波;但係,更大可能係拉埋更多人落水,例如話責任其實更大嘅運輸及房屋局副局長邱誠武,港鐵行政總裁韋達誠,以至港鐵主席錢果豐等,一場「火燒連環船」,就此盛大公演。

8仔之所以咁講,係因為今年既係「政改年」,亦都係「佔中年」,以至係「六四年」(今年係二十五周年),甚至係「國慶年」(今年係六十五周年),總之係多事之秋。從搞社會運動以至政治運動的角度嚟睇,高鐵醜聞「唔好俾佢停」,實在係一條好好用嘅縷帶。打個比喻,如果「政改」、「佔中」、「六四」、「國慶」係珠仔,咁樣高鐵就係串起晒呢啲珠仔嗰條繩。

更何況,高鐵係八十後「醒覺」嘅最重要里程碑,君不見前日反高鐵遊行,已經揭開咗「青年重奪未來」(其實係青年重奪政治經濟社會事務話語權)嘅序幕嗎?(順帶一提,「青年重奪未來」嘅英文名係「Age of Resistance」,意思即係「反抗的年代」也!)

 

唔辭職重演「包圍立法會」

再講唔辭職。

張炳良唔辭職嘅政治效應係再次勾起梁班子施政亂七八糟一塌糊塗嘅不良印象,從而凝聚到大量反政府力量。換句話說,即係嗰啲引發到香港人企出嚟走上街嘅珠仔(事件)可能更多,而高鐵呢條繩就可能會更粗、更長、更堅靱。

大家千祈唔好忘記,高鐵仲要追加撥款,仲要交代工程問題,仲要傾「一地兩檢」,如果張炳良唔辭職,根本冇公信力去面對立法會同埋公眾,以至每一樣嘢都可能會面對立法會議員「拉布」,甚至重演當年萬人包圍立法會嘅場面(呢一次更加有可能係「佔領立法會」)。

更何況,喺骨牌效應底下,之前高鐵啲舊問題(好似話沿線屋宇出現裂痕)都會重新發酵,以至捲入更多市民,成為全民運動,到時即使炒晒班蛋散都收唔到科。

 

2014起義年

所以,答案其實已經寫在牆上,就係兩害相權取其輕,張炳良盡快鞠躬下台,咁樣,啲火先至有可能唔會燒到咁大。

不過,以梁班子薄過薄撐嘅智慧、厚過厚多士嘅面皮,張炳良賴死唔走嘅可能性始終最大,情形就好似陳茂波、吳克儉、蘇錦樑一樣。假如真係咁嘅話,2014年就好大可能比8仔原先估計嘅嚟得更加洶湧澎湃,因而更加凶多吉少。

天佑香港!

 

(原圖取自:香港樹仁大學《說·在線》新聞網)

請支持我們持續發展,透過PayPal或其他方法贊助我們!
金額:
分類:|發表於2014年5月6日 上午7:30

發表評論

讀取中…
陳頌紅網誌│世界真細小小小