新聞短打│鬍鬚曾預告 本周就「剪布」?

阿健網誌│乜嘢積金局,你班高層識條乜咩?

2014-5-11 14:00
字體: A A A

今個星期日日落雨,好似星期四仲黑色暴雨警告,好多行家都喺路上死火,紅隧向九龍方向出口嘅交通意外,搞到隧道內嘅乘客要徒步離開,情況混亂兼狼狽(不過其實我揸車經過就多,我都想試吓行過去,唔知會係點架呢?)。我都算好好彩,上次黑雨兼落雹咁大鑊都係夜晚發生,我都逃咗一劫;今次又係夜晚紅雨變黑雨,行雷閃電,好彩我已經交咗更返咗屋企。

星期五如常開工,記得好早已經接咗兩個中年人,一上車就喺度講關於強積金。佢地喺度笑啲官員戇居,話只要醫生證明你淨番一年命就可以提取強積金,「大佬!醫生點證明呀?不如叫閻羅王睇吓本生死冊先啦……其實要提取好容易啫,移民咪得囉,移民返大陸都得架。」我忍唔住問:「真架?」

「真架,到民政處宣誓,再到銀行申請,大約兩星期有錢到手啦。」
「你咁清楚嘅?」
「唉……我聽人講咋。其實啲錢係自己嘅,點解要搞咁多嘢先攞得番?仲要年年畀啲基金公司收埋啲手續費,養肥佢哋。到65歲攞返啲錢時,可能佢地仲賺得多過我哋呀。」

佢地落車後,我都諗起我自己都有個冇增長嘅強積金戶口,係以前份工留下來嘅。喺度我唔係想帶一個訊息,叫人哋諗辦法去攞番自己嘅強積金,但試想想今日戶口裏面嘅錢,到我65歲時可以有咩用呢,宜家有需要又唔可以攞,唔通真係移民返大陸揸的士咩。希望啲政府官員真係為市民諗一諗,唔好再有什麼官員走出嚟講,咩600萬都叫上車盤啦,大佬!知唔知咩叫民間疾苦,放過我哋啦。

(廢除強積金陣線fb圖片)

請支持我們持續發展,透過PayPal或其他方法贊助我們!
金額:
分類:|發表於2014年5月11日 下午2:00

發表評論

讀取中…
Angelina網誌│飛機嘔吐大全