搭的士都講價，你見過未？｜銀水｜的士大哥

好多人都話而家經濟好差，但係咪真係差成咁？

首先同大家分享吓先：有時一程車25.2蚊，咁我就會覺得個客畀25蚊或者26蚊都冇所謂。試過有一次，有個女人好狼狽咁帶住兩個小朋友上車，其中一個仲係手抱添！嗰程車本身係90幾蚊，但到畀錢嗰陣，個女人同我講話身上只係得80幾蚊現金。

既然係咁，咁就冇所謂啦，喺呢啲情況我都唔係好介意，所以最後只是收佢80幾蚊。不過有時啲客真係真係好過份……

就好似前幾日咁，有4個男人喺九龍上車，話要去金鐘。嗰程車144蚊，點都估唔到嗰幾個大男人，望落官仔骨骨，著晒西裝，都會同我講價，叫我收佢哋120蚊……其實佢哋4個人平分車錢，每人本身都只係30幾蚊咋喎！

我好直接咁拒絕佢哋，一蚊都不能少！最後幾個男人先左摷右摷，先湊夠144蚊畀我……

究竟經濟係咪真係差成咁呢？唔通真係連搭的士都要講價？

（圖片來源：蘋果日報）