薯片記者會有感　七大比較位｜那幻想中的人｜黃丹瑤

曾俊華於19日宣布參選下屆特首，新開的FB專頁亦吸引過10萬人讚好，就連香港Facebook專頁都要賀一賀佢「Happy Facebooking」，雖然唔知點解少左一個參選人。不過，睇一睇曾俊華的記者會，就應該知點解有人死都唔肯開Facebook啦。曾俊華FB直播記者會，不但吸引超過一萬人收睇，更在45分鐘內吸收咗1.3萬個likes，2700個心心，嬲嬲僅過百，憑呢個數據，已經知道在「關公」上，薯片已勝過其他參選人一籌。

1. 寫參選宣言嘅人能夠代入曾俊華心境，相信同佢同年紀嘅「香港人」會有共鳴，講稿內容亦無好直白咁去sale自己，而係用香港情、希望、團結等去包裝，暗示自己可以令香港變得更好，而呢幾樣嘢，都係現今香港需要嘅，（當然都有講要背靠偉大祖國嗰啲喇）；

2. 記者會主持識得大部分記者，唔係「個位個位」咁叫人，如要對比，請回看林鄭宣布參選嘅記者會；

3. 記者會背景設計簡單簡潔，點出主題，突出主角。當然亦有人嫌太簡單，但係只要諗返葉劉嘅競選logo「吂」返香港，再加林鄭咩都無，你就會覺得都係簡單啲好；

4. 記者會內容唔悶，長度適中，開始時會同大家講流程大約有幾長，薯片仲會適時風趣一下，起碼唔係出現有嘉賓係台上瞓著的情況；

5. 記者會全程係 one-man show，不需要有什麼背後的男人／女人企係台上撐場，亦不需要有一大班支持者係背後做佈景板；

6. 記者會後唔會急急腳走，慢慢回答記者問題；

7. 最後仲會同競選團隊、支持者等，係台上影相，盡顯競選口號中的「信任」、「團結」、「希望」。

總括而言，睇得幾開心。

（圖片來源：曾俊華FB專頁）