「尖shoes」是怎樣搵到的｜謝頌昕網誌

過咗農歷新年後，有啲期待，因為終於可以著返一對好著又好睇嘅靴。介紹返，係木踭軟皮有圖案，入過幾次廠，爛踭爛拉鍊都試過。咁你或會問啦，周身傷都仲要整？

咁又要解釋吓喇，一直以來，我主要嘅鞋都係波鞋同砵（或者Cons高筒）。2012年年初去咗巴黎做交換生，每年嘅1月同7月，巴黎各大小商戶都會開始換季大減價，周街都係Soldes（減價）。難得嚟到，就梗係效法偉大祖國嘅同胞咁，去老佛爺𥄫𥄫啦！

老佛爺嘅basement專賣鞋，落到去會見到唔少紅咗眼嘅女士，兼偶爾聽到小孩嘅哭聲，咪話唔壯觀。嗰度樓面好大，貨品（鞋）亦好多，但其時我冇邊對睇啱，如上述，平日以著波鞋同砵為主，一下子突然著對幾吋斗零踭，真係不如一槍打死我。

行行重行行，竟然喺斷碼堆中搵到「尖shoes」，仲要一套落隻腳度，竟然fit到冚！唔係講笑，嗰刻我有少少哈利波特搵到自己枝魔杖嘅感覺。

所以話，心頭好呢家嘢，有時真係要用心搵先搵到，唔使多，一樣就夠。

PS，漏咗樣嘢冇講，時值換季大減價，加上係斷碼，對「尖shoes」盛惠50歐羅，慳咗逾百歐羅（冇記錯嘅話）。