十年磨一冠 雲加要露點

阿健

-的士佬手記

我叫阿健,的士佬一名,食塵多過你食米,揸車多個你行路。揸一轉的士,甜酸苦辣喜怒哀樂通通見齊。得閒嘅,咪上嚟聽吓我吹水囉。

阿健網誌│香港式的路牌,強國式的抄牌

2014-5-18 14:46
字體: A A A

自從早排睇咗《紅van》之後,每次經過獅子山隧道,都不其然會留意吓身邊啲車會否消失晒。最近另一套好想睇嘅《香港仔》,喺網上睇咗預告片,留意到有一個鏡頭――有個路牌寫住「所有目的地」。諗落真係好有哲學味道,好有深層意義,究竟香港(仔)嘅目的地喺邊呢?

講開路牌,記得某年某日,同朋友揸車遊車河,早上9點幾經過半山堅道,向西行方向,有警察喺度抄牌;時至今日,其實都仲有好多司機喺度中招,點解?當你有時間睇睇亞畢諾道嘅路牌就會知道。上面大概寫住:「星期一至五早上七時至晚上七時 星期六早上七時至下午一時 不能右轉堅道 星期日及公眾假期除外」大佬!揸緊車嘅你,邊有咁多時間睇得晒你寫咩呀!有……交通警喺前面等緊你,抄咗牌下次咪知囉。

另外講樣有趣嘢畀大家知吖,最近同朋友返深圳食飯,就見識到大陸嘅另類罰則。我朋友係有車階級,我哋一齊到龍崗飯店食飯,車停喺附近不遠處,食完飯之後,遠望見到車頭玻璃有張A4咁大嘅紙喺度,我初初以為係賣樓廣告,但我朋友就講咗句粗口。行近啲先睇度張紙寫住:「此處不能停車」我話搣咗佢咪得囉,使乜咁燥呀!「你試吓搣吖……」

當我一搣時,張紙原來係用萬能膠水黐上去,完全搣唔到呀!朋友話要用天拿水先可以擦得甩,係嗰度嘅管理員黐上去,因為佢哋冇權抄牌,警察都唔會好似香港咁到處去抄牌,唯有用呢個方法去煩吓你,等你下次唔好再亂咁停車囉。「咁都得?」佢哋好好架啦,好有技巧咁黐喺乘客嗰邊,等你可以揸番架車走。

當我哋準備上車離開時,望到對面架車,除咗司機位外,連乘客位置、兩邊車門玻璃,全部都黐咗,成棵聖誕樹一樣,架車應該喺度擺咗幾日。我哋睇咗都忍唔住大笑起嚟!哈哈!

(網絡圖片)

所有博客及專欄文章只代表作者本人意見,並不代表本報立場。
請支持我們持續發展,透過PayPal或其他方法贊助我們!
金額:
分類:|發表於2014年5月18日 下午2:46

發表評論

讀取中…
Angelina網誌│空姐搭的士多過搭巴士