香港後生仔返工冇咁投入，都唔係冇原因嘅……｜銀水｜的士大哥

呢份工最有趣嘅地方，就係每日都會遇到唔同背景嘅客人。之前同大家講過遊客點睇香港，而前幾日就有一位喺香港住咗幾年嘅臺灣人，同我分享喺香港工作嘅觀察。

呢個臺灣人係個50至60歲嘅中年女人，當日上車由將軍澳去大埔。佢除咗講國語之外，仲會夾雜啲半鹹淡嘅廣東話。同佢傾落之後，知道佢原來係臺灣人，因為覺得香港發展機會大，所以幾年前嚟咗香港生活，而家都已經喺公司做到幾高級，佢都話好鍾意香港。

講到香港工作機會多，佢都同我分享一下佢公司嘅情況。佢話留意到，公司入面上咗年紀，又或者年資比較耐嘅同事，多數都勤力啲；反而年青人，例如啱啱畢業投身社會嗰啲，做嘢就冇咁投入同上心。

另外佢又發現，公司入面唔少嚟自大陸嘅年青人，普遍都唔會斤斤計較，又唔介意OT、會花時間去諗點樣先可以做好一件事。但係香港嘅年輕人就啱啱相反，「可能因為社會環境影響啦，前景又唔明朗，佢哋可能覺得勤唔勤力都冇咩分別」。

雖然我唔係完全同意佢嘅講法，但有某部分都幾認同。而家嘅後生仔，上車又難，人工又低，就算幾努力都冇用，佢哋對前景都冇信心。我諗佢哋返工唔及其他人咁上心，都唔係完全冇原因嘅，總之做好份內事就得啦。

（圖片來源：台灣蘋果日報）