呃blog吹大法｜謝頌昕網誌

自從852實行返長短週之後，大家周末都有一樣功課要做：寫罐頭稿。做法有兩個，一係寫吓啲奇趣新聞（我就專攻啲足球無厘頭新聞啦），一係就寫網誌。有同事會專攻網誌，我就原則上兩邊走，但近期又發現咗一樣有趣嘢。

查實呢，每位入得嚟852嘅靚仔靚女呢，都要開個column嘅，睇吓自己想寫咩啦，我就因為周身刀冇張利，寫乜都係隨心啦。2014年嗰陣，就個個每周都要嘔一篇，但後來雨傘運動打到嚟，都做到半條人命，個規定亦慢慢冇咗，改為寫吓soft news都收貨。

我有幸參與過呢個每周都嘔blog嘅過程，老實講，都係夾硬搵嘢嚟寫，扮晒有深度有睇法咁，算把啦，其實自己都唔知講緊乜。到後來又密密寫過一輪，不時都係因應嗰陣有咩幾爆嘅新聞，就搭嘴寫吓啦，可以係搞笑，又可以係認真啲拆吓。不過問題嚟喇，認真拆嘅文章，平日就寫唔夠咩？除咗口語啲之外，仲有咩特別先？所以簡單嚟講，都係借我個牌頭出嘅文嚟啫，擺喺邊個column都冇咩分別。

不過到呢近半年，情況又有啲唔同。

題材不盡是同時事有關，有時甚至只係身邊一啲好微細嘅事，單係去信和買碟，都寫咗三篇（當然你可以話係呃嘅……）買鞋也好，食豬扒包也好，甚至係兩位弟弟連秦沛同秦檜都分唔到也好，都轉化到做一篇網誌。當然可以話我呃水吹嘅能力高咗，但仍有另一個可能：睇嘢多咗，想講嘅嘢亦多咗。

來日方長，希望一直有嘢想講，亦希望有空間畀我繼續講。與此同時，請慢慢聽我講，聽我用口語，慢慢同你講。